वालुज महानगर (प्रतिनिधि जाकिर शाह मो 9158921696) une to Chhatrapati Sambhajinagar Expresswayजालना, पुढारी वृत्तसेवा: पुणे ते छत्रपती संभाजीनगर द्रुतगती महामार्गाची लांबी जालना शहरापर्यंत वाढविण्यात येईल तसेच ड्रायपोर्टच्या रखडलेल्या कामास गती देऊन लवकरच काम पूर्ण केले जाईल, असे स्पष्ट आश्वासन केंद्रीय रस्ते, परिवहन व महामार्ग मंत्री नितीन गडकरी यांनी आ. अर्जुनराव खोतकर यांना दिले. जालना शहरातील दोन प्रमुख रस्त्यांनाही निधीसह मंजुरी देण्यात येईल, अशी ग्वाही त्यांनी यावेळी दिली.
केंद्रीय मंत्री नितीन गडकरी यांची ९ ऑक्टोबर रोजी आमदार अर्जुनराव खोतकर यांनी दिल्ली येथे भेट घेतली. यावेळी खोतकर यांनी त्यांना मागण्यांचे निवेदन दिले व त्यासंबंधी चर्चा केली. यावेळी जालन्यातील एक उद्योजक नंदकिशोर जेथलिया हेही उपस्थित होते.यावेळी केंद्रीय मंत्री गडकरी यांनी सांगितले की, पुणे ते छत्रपती संभाजीनगर हा महामार्ग जालना शहरापर्यंत वाढविण्यात येईल तसेच समृद्धी महामार्गाच्या इंटरचेंज पॉईंटला जोडण्यात येईल. तसेच ड्रायपोर्टचे रखडलेले काम गतीने पूर्ण करण्यात येईल. या कामात दिरंगाई करणाऱ्यावर कार्यवाही करण्यात येईल, असेही त्यांनी स्पष्ट केले. याबाबत गडकरी यांनी संबंधित अधिकाऱ्यांना सूचनाही दिल्या.
जालनेकरांना दिवाळी भेट !
जालना शहरातील भोकरदन नाका ते ढवळेश्वर मार्गे भोकरदन चौफुली पर्यंतचा रस्ता तसेच राजमाता जिजाऊ चौक ते नाव्हा चौफुलीपर्यंतचा रस्ता खराब आहे. या दोन्ही रस्त्यांना निधीसह मंजुरी देण्यात येईल, अशी ग्वाही केंद्रीय मंत्री गडकरी यांनी दिली. पुणे-जालना महामार्ग व जालन्यातील रस्त्यांन मंजुरी ही दिवाळी भेट ठरणार आहे
