भुसावळ: भुसावळ रेल्वे स्थानकावर सुमारे एक कोटी रुपयांच्या बनावट नोटा सापडल्याने खळबळ माजली आहे. या नोटा संशयितांच्या सामानातून मिळाल्या असून, पोलिसांनी त्या ताब्यात घेतल्या आहेत.
संशयित प्रवाशांवर संशय, पोलिसांची कारवाई
मलकापूरवरून भुसावळच्या दिशेने रेल्वेने प्रवास करणाऱ्या दोन संशयित प्रवाशांवर रेल्वे पोलिसांचा संशय बळावला. त्यांच्या सामानाची झडती घेतली असता, एक कोटी रुपयांच्या बनावट नोटांचा साठा आढळून आला.
तपासादरम्यान एक संशयित पसार झाला, तर दुसऱ्या व्यक्तीस रेल्वे पोलिसांनी अटक केली आहे. पोलिसांनी त्याच्याकडून अधिक चौकशी सुरू केली आहे.
‘चिल्ड्रन बँक’च्या नोटा आढळल्या
संशयितांच्या सामानात आढळलेल्या 500 रुपयांच्या बंडलमध्ये वरची नोट खरी होती, मात्र खालच्या सर्व नोटांवर ‘चिल्ड्रन बँक’ असे लिहिलेले आढळले. त्यामुळे त्या बनावट असल्याचे उघड झाले.
रेल्वे सुरक्षा यंत्रणा सतर्क
या घटनेनंतर रेल्वे सुरक्षा बल (RPF) आणि लोहमार्ग पोलिसांनी खबरदारी वाढवली आहे. अटकेतील संशयिताची कसून चौकशी सुरू असून, पळून गेलेल्या आरोपीचा शोध सुरू आहे.
रेल्वे पोलिसांनी प्रवाशांना सतर्क राहण्याचे आवाहन केले असून, बनावट नोटा वितरणाच्या मोठ्या रॅकेटचा तपास सुरू आहे.
Discussion about this post