कंधार येथील मुक्ताई नगरातील फलक वेधून घेतोय लक्ष – एकनाथ पवार नेमके कोणत्या पक्षात?

प्रतिनिधी: गोविंद ढगे, लोहा

कंधार येथील मुक्ताई नगर परिसरात एकनाथ पवार यांच्या निवासस्थानाकडे जाणाऱ्या मार्गावरील फलकाने नागरिकांचे लक्ष वेधून घेतले आहे. शिवसेना (उबाठा) चे राज्य संघटक असलेल्या एकनाथ पवार यांनी भाजपमध्ये पुनरागमन केले असले तरी, त्यांच्या निवासस्थानाजवळ अद्यापही शिवसेनेच्या नावे असलेला फलक बदलण्यात आलेला नाही. त्यामुळे स्थानिकांमध्ये गोंधळ निर्माण झाला असून, “एकनाथ पवार नेमके कुठल्या पक्षात आहेत?” असा प्रश्न उपस्थित केला जात आहे.

भाजपमधून शिवसेनेत, आणि पुन्हा भाजपमध्ये?

पूर्वी पिंपरी-चिंचवड महानगरपालिकेत भाजपचे गटनेते राहिलेले एकनाथ पवार यांनी पाच वर्षांपूर्वी लोहा-कंधार विधानसभा मतदारसंघात भाजपच्या माध्यमातून आपली ताकद वाढविण्यासाठी प्रयत्न सुरू केले होते. मात्र, मराठा आरक्षणाच्या मुद्यावरून भाजपला सोडचिठ्ठी देत त्यांनी उध्दव ठाकरे यांच्या नेतृत्वाखालील शिवसेनेत (उबाठा) प्रवेश केला.

लोकसभा निवडणुकीत महाविकास आघाडीने यश संपादन केल्यानंतर एकनाथ पवार यांनी लोहा-कंधार मतदारसंघात शिवसेनेच्या संघटन वाढीसाठी मोठे प्रयत्न केले आणि विधानसभेच्या तिकिटावर निवडणूक लढवली. प्रचार जोरदार झाला, सर्वेक्षणेही त्यांच्या बाजूने होती, मात्र अंतिम टप्प्यात त्यांना पराभवाला सामोरे जावे लागले.

पराभवानंतर भाजपमध्ये पुनरागमन

राज्यात महाविकास आघाडीचा पराभव झाल्यानंतर भाजप, शिवसेना (शिंदे गट), आणि राष्ट्रवादी काँग्रेस (अजित पवार गट) यांचा समावेश असलेल्या महायुतीने स्पष्ट बहुमत मिळवले. अनेक नेते महायुतीच्या पक्षांमध्ये प्रवेश करत असताना, एकनाथ पवार यांनीही भाजपमध्ये पुनरागमन केले.

पण फलक बदलला नाही, नागरिक संभ्रमात

एकनाथ पवार यांनी जरी भाजपमध्ये घरवापसी केली असली तरी, त्यांच्या कंधार येथील निवासस्थानाजवळचा “शिवसेना राज्य संघटक एकनाथ पवार यांच्या निवासस्थानाकडे” हा फलक अद्यापही बदललेला नाही. त्यामुळे स्थानिक नागरिकांमध्ये संभ्रमाची परिस्थिती निर्माण झाली आहे.

पवार नेमके भाजपचे की शिवसेनेचे? हा फलक अद्याप का बदलला नाही? हे पवारांचे राजकीय डावपेच आहेत का? असे प्रश्न नागरिक आणि राजकीय वर्तुळात उपस्थित होत आहेत.

– गोविंद ढगे, लोहा प्रतिनिधी