कणकवली | प्रतिनिधी –
Kankavli नगरपंचायत प्रभाग क्र. १२ मधील विविध प्रलंबित विकासकामांबाबत नागरिकांच्या वतीने नगराध्यक्ष Sandesh Parkar यांना प्रांजली प्रदीप आरोलकर यांनी निवेदन सादर केले. वाढत्या शहरीकरणाच्या पार्श्वभूमीवर मूलभूत सुविधांकडे तातडीने लक्ष देण्याची मागणी करण्यात आली आहे.
निवेदनानुसार, तेली आळीतील दुतर्फा गटारे मातीत भरलेली असून त्यांची तात्काळ साफसफाई व आवश्यक त्या ठिकाणी दुरुस्ती अथवा नव्याने बांधकाम करणे गरजेचे आहे. हर्णे आळीतील भूमिगत गटारांच्या चेंबरवरील झाकणे खराब अवस्थेत असल्याने ती नव्याने बसवावीत, अशी मागणी करण्यात आली आहे.
श्री. नंदू आरोलकर ते श्री. उत्तम वालावलकर यांच्या घरामागील नगरपंचायतीच्या मालकीच्या जागेची मोजणी करून त्या ठिकाणी सार्वजनिक विहीर, ज्येष्ठ नागरिकांसाठी विरंगुळा केंद्र तसेच तरुणांसाठी ओपन जिम उभारण्याचा प्रस्ताव मांडण्यात आला आहे. तसेच श्री. उपरकर गुरुजी ते श्री. अतुल काळसेकर यांच्या घरामागील पाणंद बांधण्याची मागणी करण्यात आली आहे.
प्रभागातील आरक्षण क्र. २३ (गार्डन) व २४ (प्ले ग्राउंड) विकसित करून युवकांसाठी छोटे मैदान उपलब्ध करून द्यावे, कस्टम ऑफिस ते सह्याद्री हॉटेल हा रस्ता रुंदीकरण करून सुस्थितीत करावा तसेच छोट्या ड्रेनेज लाईन्सची दुरुस्ती करावी, अशी मागणी करण्यात आली आहे.
हर्णे आळीतील श्री. मधु हर्णे यांच्या घरासमोरील ब्राम्हण स्थळ परिसराचे सुशोभीकरण करावे. नियमित कचरा संकलनासाठी घंटागाडी उपलब्ध करून किमान दोन कायम कर्मचारी नेमावेत, अशीही मागणी करण्यात आली आहे.
याशिवाय छत्रपती शिवाजी महाराज चौक येथील महामार्गालगत सार्वजनिक बांधकाम विभागाच्या जागेत सार्वजनिक शौचालय व बाहेरगावाहून येणाऱ्यांसाठी विरंगुळा केंद्र उभारण्याची सूचना करण्यात आली आहे. तेंडोलकर अँड कंपनीलगत गग्नेशनिलया कॉम्प्लेक्सकडे जाणारा रस्ता दुरुस्त करणे, सार्वजनिक गटारांवर झाकणे बसविणे व आवश्यक त्या ठिकाणी चेंबर बांधणे याकडेही लक्ष वेधण्यात आले आहे.
तसेच पंचायत समिती कार्यालयाच्या मागील जुन्या जिल्हा परिषद शाळा क्र. ४ च्या ठिकाणी अंगणवाडी सुरू करण्याची मागणी करण्यात आली आहे.
नगराध्यक्ष संदेश पारकर यांनी संबंधित ठिकाणांची प्रत्यक्ष पाहणी करून आवश्यक ती कार्यवाही करण्याचे आश्वासन दिल्याची माहिती निवेदनातून देण्यात आली आहे.
