२० मतांनी ठराव पारित; नगराध्यक्षा ऐश्वर्या अभिजीत पाचर्णे यांच्या अध्यक्षतेखाली विशेष सर्वसाधारण सभा संपन्न
पुणे प्रतीनिधी
शिरूर : शिरूर नगरपरिषदेचे उपनगराध्यक्ष मितेश प्रदीप गादिया यांना पदावरून दूर करण्यासाठी मांडण्यात आलेला अविश्वास ठराव शुक्रवार, दि. ३० ऑक्टोबर २०२६ रोजी झालेल्या विशेष सर्वसाधारण सभेत बहुमताने मंजूर करण्यात आला. उपनगराध्यक्षांना पदावरून दूर करण्याच्या बाजूने २० मते पडल्याने त्यांना उपनगराध्यक्ष पदावरून काढून टाकण्याचा निर्णय घेण्यात आल्याचे नगराध्यक्षा ऐश्वर्या अभिजीत पाचर्णे यांनी सभेत जाहीर केले. शुक्रवारी सकाळी ११ वाजता शिरूर नगरपरिषदेची विशेष सर्वसाधारण सभा नगराध्यक्षा ऐश्वर्या अभिजीत पाचर्णे यांच्या अध्यक्षतेखाली आदरणीय श्री. रसिकभाऊ धारिवाल सभागृहात आयोजित करण्यात आली होती. महाराष्ट्र नगरपरिषदा, नगरपंचायती व औद्योगिक नगरी अधिनियम, १९६५ मधील कलम ५५-१अ अन्वये उपाध्यक्षांना पदावरून दूर करण्यासंदर्भातील तरतुदीनुसार, नगरपरिषदेच्या सदस्यांकडून प्राप्त झालेल्या अर्जावर विचारविनिमय करून निर्णय घेण्यासाठी ही विशेष सभा बोलावण्यात आली होती.
२६ ऑक्टोबर रोजी दिली होती नोटीस
शिरूर नगरपरिषदेच्या कामकाजाबाबत असमाधान व्यक्त करत नगरपरिषदेच्या नगरसेविका संगीता महेंद्र मल्लाव व इतर १८ नगरसेवकांनी उपनगराध्यक्ष मितेश गादिया यांच्याविरोधात अविश्वास ठराव मांडण्यासाठी विशेष सभा लवकरात लवकर आयोजित करावी, अशी मागणी केली होती. यासंदर्भात संबंधित नगरसेवकांनी दि. २६ ऑक्टोबर २०२६ रोजी नगराध्यक्षा यांना सूचना नोटीस दिली होती. या नोटिशीच्या अनुषंगाने अविश्वास ठराव मांडण्याचा निर्णय घेण्यात आला आणि कायद्यातील संबंधित तरतुदीनुसार दि. ३० ऑक्टोबर रोजी विशेष सर्वसाधारण सभा आयोजित करण्यात आली.
२८ पैकी २७ सदस्यांची उपस्थिती; सहा सदस्यांचा सभात्याग
विशेष सर्वसाधारण सभेच्या सुरुवातीला नगरपरिषदेच्या एकूण २८ सदस्यांपैकी २७ सदस्य उपस्थित होते. मात्र, सभेदरम्यान सहा सदस्यांनी सभात्याग केला. यामध्ये उपनगराध्यक्ष मितेश प्रदीप गादिया, स्वप्नाली योगेश जामदार, सुनीता संतोष पोटे, चारुशिला गणेश कोळपकर, रवी ऊर्फ शाम मनोहर ढोबळे आणि अमोल दादासाहेब चव्हाण यांचा समावेश होता.
२० मतांनी अविश्वास ठराव मंजूर
सभेत उपनगराध्यक्ष मितेश प्रदीप गादिया यांना पदावरून दूर करण्यासंदर्भातील प्रस्तावावर निर्णय घेण्यात आला. उपनगराध्यक्षांना पदावरून काढून टाकण्याच्या बाजूने सर्वाधिक २० मते पडली. त्यामुळे अविश्वास ठराव बहुमताने मंजूर झाल्याचे नगराध्यक्षा ऐश्वर्या अभिजीत पाचर्णे यांनी जाहीर केले. त्यानुसार मितेश प्रदीप गादिया यांना शिरूर नगरपरिषदेच्या उपनगराध्यक्षपदावरून दूर करण्याचा निर्णय घेण्यात आला.
उपस्थित सदस्यांचे आभार मानून सभेची सांगताविशेष सर्वसाधारण सभेतील संपूर्ण प्रक्रियेदरम्यान उपस्थित असलेल्या सर्व सन्माननीय सदस्यांनी सहकार्य केले. त्याबद्दल उपस्थित सदस्यांचे आभार मानून सभेचे कामकाज समाप्त झाल्याचे नगराध्यक्षा ऐश्वर्या अभिजीत पाचर्णे यांनी जाहीर केले. शिरूर नगरपरिषदेच्या राजकीय घडामोडींमध्ये उपनगराध्यक्षांविरोधातील अविश्वास ठराव बहुमताने मंजूर होणे ही महत्त्वाची घडामोड मानली जात आहे.
