पालम (प्रतिनिधी) :
पालम तालुक्यातील मौजे बनवस शेतशिवारात एका अनोळखी तरुणाचा मृतदेह आढळून आल्याने परिसरात खळबळ उडाली आहे. या प्रकरणी पालम पोलीस ठाण्यात गुन्हा दाखल करण्यात आला असून पोलिसांकडून मृताची ओळख पटविण्याचे प्रयत्न सुरू आहेत.
पोलीस सूत्रांकडून मिळालेल्या माहितीनुसार, दि. १७ एप्रिल २०२६ रोजी सकाळी सुमारे ७ वाजण्याच्या सुमारास ही घटना उघडकीस आली. संबंधित इसमाने स्वतःच्या ताब्यातील मोटारसायकल भरधाव व निष्काळजीपणे चालवल्याने अपघात होऊन त्याचा मृत्यू झाल्याचा प्राथमिक अंदाज व्यक्त करण्यात आला आहे.
मृत व्यक्तीचे वय अंदाजे २५ ते ३० वर्षे असून तो पुरुष आहे. त्याचा चेहरा लांबट, रंग सावळा व उंची सुमारे साडेपाच फूट आहे. पोटावर बेंबीच्या वरच्या बाजूस तिळ असल्याची नोंद आहे. अंगात काळी पॅन्ट, आकाशी रंगाचा शर्ट (AX SHIVSAI Casual Wear असा उल्लेख), कॉटन कॅंडी बनियन व लाल रंगाचे अंडरवेअर असा पोशाख आढळून आला.
या प्रकरणी पालम पोलीस ठाण्यात भारतीय न्याय संहिता कलम १०६(१) अन्वये गुन्हा नोंदविण्यात आला आहे.
यासंदर्भात कोणास संबंधित व्यक्तीची ओळख, नाव, गाव किंवा नातेवाईक याबाबत माहिती असल्यास त्यांनी शेषराव खटाणे (मो. ७९७२३०८०९०) किंवा शिवकांत नागरगोजे (मो. ९०७५२६११२७) यांच्याशी किंवा पालम पोलीस ठाण्याशी तात्काळ संपर्क साधावा, असे आवाहन पोलिसांकडून करण्यात आले आहे.
