नगराध्यक्ष मध्यरात्री चिखलात;”रात्रभर सुरू ठेवली दुरुस्ती मोहीम
मुख्य जलवाहिनीला गळती”;
परभणी /प्रतिनिधी :- रमेश मुलगीर
नागरिकांची तहान भागवण्यासाठी नगराध्यक्षांसह सहकाऱ्यांचे रात्रभर श्रम
सोनपेठ शहरातील नागरिकांना अखंडित पाणीपुरवठा मिळावा यासाठी नगराध्यक्षांनी स्वतः मध्यरात्री चिखलात उतरून दुरुस्तीचे काम केल्याची घटना शुक्रवारी (दि. २९ मे) पहाटेपर्यंत चर्चेचा विषय ठरली. मुख्य पाणीपुरवठा पाइपलाइनला मोठी गळती लागल्याने शहराचा पाणीपुरवठा विस्कळीत होण्याची शक्यता निर्माण झाली होती. मात्र, नागरिकांना पाण्याचा त्रास होऊ नये म्हणून नगराध्यक्ष परमेश्वर भैय्या कदम यांनी सहकाऱ्यांसह घटनास्थळी धाव घेत रात्रभर काम करून पाइपलाइन दुरुस्त केली.
मिळालेल्या माहितीनुसार, शहराला पाणीपुरवठा करणाऱ्या मुख्य जलवाहिनीला अचानक मोठी गळती लागली. यामुळे शहरातील पाणीपुरवठा खंडित होण्याची शक्यता निर्माण झाली होती. उन्हाळ्याचे दिवस आणि तीव्र उष्णतेमुळे नागरिकांना आधीच पाण्याच्या समस्यांना सामोरे जावे लागत असल्याने ही बाब प्रशासनासाठी मोठे आव्हान ठरली होती.
घटनेची माहिती मिळताच नगराध्यक्ष परमेश्वर भैय्या कदम यांनी तत्काळ घटनास्थळी भेट दिली. रात्री उशिरापर्यंत आणि पहाटेपर्यंत सुरू असलेल्या दुरुस्ती कामात त्यांनी केवळ देखरेख न करता स्वतः प्रत्यक्ष सहभाग घेतला. चिखलात उतरून कामगारांना मार्गदर्शन करत दुरुस्तीची कामे वेगाने पूर्ण करण्यासाठी त्यांनी विशेष प्रयत्न केले.
यावेळी गटनेते हाजी सदामभाई हुसेन, नगरसेवक अक्षय कदम तसेच इतर कार्यकर्ते आणि कर्मचारीही घटनास्थळी उपस्थित होते. सर्वांनी मिळून रात्रभर मेहनत घेत पाइपलाइनची गळती दुरुस्त केली.
परिणामी शहराचा पाणीपुरवठा पूर्ववत करण्यात यश आले.
स्थानिक नागरिकांनी नगराध्यक्षांच्या या तत्परतेचे आणि जनहितासाठी केलेल्या परिश्रमांचे कौतुक केले. नागरिकांच्या मूलभूत गरजांसाठी लोकप्रतिनिधींनी अशा प्रकारे प्रत्यक्ष मैदानात उतरून काम करणे ही सकारात्मक बाब असल्याची प्रतिक्रिया अनेकांनी व्यक्त केली.
दरम्यान, या घटनेनंतर शहरातील पाणीपुरवठा व्यवस्थेच्या देखभालीचा प्रश्नही पुन्हा ऐरणीवर आला आहे. जुनी झालेली जलवाहिनी, वारंवार होणाऱ्या गळतीच्या घटना आणि त्यावर कायमस्वरूपी उपाययोजना करण्याची गरज असल्याचे मत नागरिकांकडून व्यक्त केले जात आहे.
नागरिकांमध्ये समाधान
रात्रभर चाललेल्या दुरुस्ती मोहिमेनंतर शहरातील पाणीपुरवठा सुरळीत झाल्याने नागरिकांनी समाधान व्यक्त केले. “जनतेच्या अडचणीच्या वेळी लोकप्रतिनिधींनी प्रत्यक्ष उपस्थित राहून समस्या सोडवणे हे कौतुकास्पद आहे,” अशा प्रतिक्रिया नागरिकांनी दिल्या.
फोटो कॅप्शन :
सोनपेठ शहरातील मुख्य पाणीपुरवठा पाइपलाइनची गळती दुरुस्त करण्यासाठी नगराध्यक्ष परमेश्वर भैय्या कदम व सहकारी मध्यरात्री घटनास्थळी रात्रभर काम करताना.
