भोपाळवाडी | प्रतिनिधी
मौजे भोपाळवाडी येथे लोकमाता पुण्यश्लोक राजमाता अहिल्यादेवी होळकर यांची जयंती उत्साहपूर्ण वातावरणात साजरी करण्यात आली. यावेळी राजमाता अहिल्यादेवी होळकर यांच्या प्रतिमेला पुष्पहार अर्पण करून अभिवादन करण्यात आले तसेच त्यांच्या महान कार्याचा गौरव करण्यात आला.
कार्यक्रमाच्या अध्यक्षस्थानी व प्रमुख पाहुणे म्हणून गावातील माजी सरपंच रावसाहेब पाटील भोपाळे उपस्थित होते. यावेळी त्यांनी राजमाता अहिल्यादेवी होळकर यांच्या लोककल्याणकारी कार्याचा आढावा घेत त्यांच्या विचारांचे अनुकरण करण्याचे आवाहन केले. समाजहित, न्यायनिष्ठा, महिला सक्षमीकरण आणि धर्मसंवर्धनासाठी त्यांनी केलेले कार्य आजही प्रेरणादायी असल्याचे त्यांनी सांगितले.
या प्रसंगी शिवाजी पाटील भोपाळे, जीवन पाटील भोपाळे, नागेश तुपेकर, नामदेव करडे, संदीप वडजे, शुभम करडे, श्रीकांत वडजे, शिवप्रसाद तुप्पेकर, आदित्य इंगोले, मारुती पाटील भोपाळे तसेच गावचे पोलीस पाटील महेश करडे यांच्यासह अनेक ग्रामस्थ उपस्थित होते.
उपस्थित मान्यवरांनी राजमाता अहिल्यादेवी होळकर यांच्या जीवनकार्याचे स्मरण करून त्यांच्या आदर्शांचा समाजाने अंगीकार करणे हीच त्यांना खरी आदरांजली ठरेल, असे मत व्यक्त केले. कार्यक्रमात सामाजिक एकोपा, महिला सन्मान आणि लोकसेवेचा संदेश देण्यात आला.
गावातील नागरिकांनी मोठ्या संख्येने उपस्थित राहून कार्यक्रम यशस्वी केला. जयंतीनिमित्त आयोजित या कार्यक्रमामुळे भोपाळवाडी परिसरात प्रेरणादायी आणि उत्साहाचे वातावरण निर्माण झाले होते.
राजमाता अहिल्यादेवी होळकर अमर राहो, अशा घोषणांनी कार्यक्रमाची सांगता करण्यात आली.
