शिवशक्ती युवा नवरात्र उत्सव मंडळाचा उपक्रम; ग्रामस्थांचा उत्स्फूर्त प्रतिसाद
रिटकवली | प्रतिनिधी
आदिशक्ती महाकालीच्या आराधनेतून भक्तिभाव जागवतानाच सामाजिक सेवेचा वसा जपण्याचा स्तुत्य उपक्रम रिटकवली येथे राबविण्यात आला. शिवशक्ती युवा नवरात्र उत्सव मंडळाच्या वतीने मोफत आरोग्य तपासणी आणि रक्तदान शिबिराचे आयोजन करण्यात आले होते. या उपक्रमाला ग्रामस्थांनी उत्स्फूर्त प्रतिसाद दिला.
रिटकवली येथील महाकाली देवीच्या दर्शनासाठी महाराष्ट्राच्या विविध भागांतून भाविक येत असतात. धार्मिक उत्सवाला सामाजिक सेवेची जोड देण्याच्या उद्देशाने मंडळाने या शिबिराचे आयोजन केले. आरोग्य तपासणीदरम्यान ग्रामस्थांचा रक्तदाब, रक्तातील साखर तसेच त्यांच्या आरोग्यविषयक तक्रारींची तपासणी करण्यात आली.
या शिबिरात ज्येष्ठ नागरिक, महिला, पुरुष आणि तरुणांनी सहभाग नोंदवून आरोग्य तपासणीचा लाभ घेतला. तसेच रक्तदानाच्या माध्यमातून गरजू रुग्णांना मदत करण्यासाठी ग्रामस्थांनी योगदान दिले.
धार्मिक श्रद्धेसोबत सामाजिक बांधिलकी जपत आरोग्यसेवा आणि रक्तदानाचा उपक्रम राबविल्याबद्दल शिवशक्ती युवा नवरात्र उत्सव मंडळाचे ग्रामस्थांकडून कौतुक होत आहे. भक्तीला सेवाकार्याची जोड देणारा हा उपक्रम समाजासाठी प्रेरणादायी ठरत आहे.
