जिल्हास्तरीय स्पर्धा परीक्षा निवड चाचणीत सातवी-आठवी गटातून प्रथम क्रमांक; थुंबा येथील डॉ. विक्रम साराभाई स्पेस सेंटरला देणार भेट
जामखेड | प्रतिनिधी
अहिल्यानगर जिल्ह्यातील जामखेड तालुक्यातील सारोळा गावच्या धनश्री अनिल काशिद हिने जिल्हास्तरीय स्पर्धा परीक्षा निवड चाचणीत उल्लेखनीय यश संपादन केले आहे. जिल्हा परिषद शिक्षण विभाग (प्राथमिक), अहिल्यानगर यांच्या वतीने आयोजित जिल्हास्तरीय स्पर्धा परीक्षा २०२६ मध्ये सातवी-आठवी गटातून प्रथम क्रमांक मिळवत तिने इस्रो सहलीसाठी निवड होण्याचा मान पटकावला आहे. या यशामुळे धनश्रीला विमान प्रवासाची संधी मिळणार असून, केरळमधील थुंबा येथील डॉ. विक्रम साराभाई स्पेस सेंटरला भेट देण्याची संधीही तिला मिळाली आहे.
धनश्री ही जिल्हा परिषद प्राथमिक शाळा, सारोळा, केंद्र राजुरी, ता. जामखेड येथील इयत्ता आठवीत शिकत आहे. तिच्या या यशामुळे शाळा, गाव आणि परिसरातून तिचे कौतुक होत आहे.
या यशासाठी धनश्रीला शाळेचे मुख्याध्यापक संदीप भालसिंग, वर्गशिक्षक तथा पदवीधर शिक्षक सुरेश बर्वे, मार्गदर्शक शिक्षक राहुल लिमकर, अर्चना त्रिमुखे, प्रशांत होळकर, शबाना शेख, वृषाली खांदवे आणि अमृता रसाळ यांचे मोलाचे मार्गदर्शन लाभले.
धनश्रीच्या यशाबद्दल जामखेड पंचायत समितीचे गटविकास अधिकारी शुभम जाधव, गटशिक्षणाधिकारी धनंजय बोंदार्डे, जामखेड बीटचे शिक्षण विस्तार अधिकारी जालिंदर खताळ, राजुरी केंद्राचे समन्वयक माजिद शेख, अहिल्यानगर जिल्हा नियोजन समितीचे सदस्य तथा भाजपचे जिल्हा उपाध्यक्ष अजयदादा काशिद, माजी सरपंच रितूताई अजयदादा काशिद, माजी उपसरपंच हर्षद मुळे, शाळा व्यवस्थापन समितीचे अध्यक्ष सतीश मुळे, उपाध्यक्ष ज्ञानेश्वर जगदाळे, पालक आणि ग्रामस्थांनी धनश्रीसह मार्गदर्शक शिक्षकांचे अभिनंदन केले.
धनश्रीच्या या उल्लेखनीय यशामुळे सारोळा गावाच्या शिरपेचात मानाचा तुरा रोवला गेला आहे. तिच्या यशाने शाळेचा आणि गावाचा गौरव वाढला असून, तिच्या पुढील शैक्षणिक वाटचालीसाठी सर्व स्तरांतून शुभेच्छा दिल्या जात आहेत.
