श्रीगोंदा :
श्रीगोंदा येथील वेंकटेश पोदार लर्न स्कूलच्या विद्यार्थ्यांनी राज्यस्तरीय शालेय क्रीडा स्पर्धेत शास्त्रंग मार्शल आर्ट प्रकारात उल्लेखनीय यश संपादन करत राष्ट्रीय पातळीवर झेप घेण्याची तयारी केली आहे.
छत्रपती संभाजीनगर येथील विभागीय क्रीडा संकुलात दि. १६ व १७ फेब्रुवारी २०२६ रोजी झालेल्या स्पर्धेत राज्यभरातील खेळाडूंनी सहभाग घेतला होता. १९ वर्षांखालील गटात झालेल्या लढतींमध्ये शाळेच्या विद्यार्थ्यांनी उत्कृष्ट कामगिरी करत पदके पटकावली.
१९ वर्षांखालील मुली गटात ईशा संतोष गोरे हिने सुवर्णपदक जिंकले, तर मुलांच्या गटात सम्राटराजे चांगदेव पाचपुते याने कांस्यपदक मिळवले. त्यांच्या या यशामुळे शाळा परिसरात आनंदाचे वातावरण निर्माण झाले आहे.
विद्यार्थ्यांच्या या यशामागे क्रीडा शिक्षक बाबू बळे सर यांचे मार्गदर्शन व परिश्रम महत्त्वाचे ठरले. विजेत्या खेळाडूंचे अभिनंदन शिक्षण संचालक आनंद शहा तसेच संस्थेच्या विश्वस्तांनी करून पुढील स्पर्धांसाठी शुभेच्छा दिल्या. राज्यस्तरीय यशानंतर आता हे विद्यार्थी राष्ट्रीय स्तरावर चमकदार कामगिरी करतील, असा विश्वास व्यक्त करण्यात येत आहे.
