पनवेल प्रतिनिधी :
पनवेल महापालिकेने तळोजा आणि नावडे परिसरातील अनधिकृत आठवडा बाजारांवर धडक कारवाई करत अतिक्रमण हटविण्याची मोहीम राबवली. आयुक्त मंगेश चितळे यांच्या निर्देशानुसार अतिक्रमण विभागाने ही कारवाई केली.
तळोजा फेज-१, सेक्टर-१० येथे १३ एप्रिल रोजी अनधिकृत बाजारावर कारवाई करण्यात आली. कारवाईनंतर पुन्हा बाजार भरू नये यासाठी त्या ठिकाणी अतिक्रमण विभागाचे कर्मचारी आणि सुरक्षा रक्षक तैनात करण्यात आले आहेत.
याचप्रमाणे नावडे उपविभागातील घोडगाव येथे भरत असलेल्या अनधिकृत सोमवार बाजारावरही कारवाई करण्यात आली. येथेही भविष्यात बाजार भरू नये म्हणून कर्मचारी व सुरक्षा रक्षकांची नियुक्ती करण्यात आली आहे.
उपायुक्त नानासाहेब कामठे यांच्या सूचनेनुसार सहायक आयुक्त सुबोध ठाणेकर यांच्या मार्गदर्शनाखाली प्रभारी प्रभाग अधिकारी मनोज चव्हाण यांनी ही मोहीम राबवली. या कारवाईदरम्यान अनधिकृतपणे बाजार भरवणाऱ्या फेरीवाले व हातगाड्यांवर तोडक कारवाई करून आठवडा बाजार बंद करण्यात आला.
महापालिकेने स्पष्ट केले आहे की, शहरातील अतिक्रमणाविरोधात अशी कारवाई पुढेही सातत्याने सुरू राहणार आहे.
