नाशिक | विशेष प्रतिनिधी
भारतरत्न डॉ. बाबासाहेब आंबेडकर यांच्या १३५ व्या जयंतीचे औचित्य साधून पंचक परिसरात मुलींसाठी मोफत कराटे प्रशिक्षण वर्ग सुरू करण्यात आला असून, या उपक्रमाचे उद्घाटन उत्साहात पार पडले. समर्थ सेवा मंडळ, सकल मराठा परिवार आणि शनेश्वर भक्त मंडळ यांच्या संयुक्त विद्यमाने हा उपक्रम राबविण्यात आला आहे.
कार्यक्रमाचे विशेष आकर्षण म्हणजे पंचक येथील कु. गौतमी रंगनाथ भोई हिची ग्रामीण पोलीस दलात निवड झाल्याबद्दल करण्यात आलेला सत्कार. ॲड. सुनील अण्णा बोराडे यांच्या हस्ते तिचा गौरव करण्यात आला. या निमित्ताने ग्रामीण भागातील मुलींनी स्वसंरक्षणाचे धडे घेऊन पोलीस दलासारख्या क्षेत्रात प्रगती साधावी, असा संदेश देण्यात आला.
या कार्यक्रमाला नगरसेविका सौ. सुनीता सागर भोजने यांच्यासह रोहिणी जाधव, कैलास मधुकर आढाव, चंद्रकांत चव्हाणके, दिनकर आप्पा आढाव आदी मान्यवर उपस्थित होते. तसेच आयोजक व पदाधिकारी शंकरराव बोराडे, ॲड. सोमनाथ बोराडे, गौतम भालेराव, स्नेहल काळे, सिंधुताई पगार, मंगल मोरे, पूनम डहाळे, खंडू आहेर, संजय झारोळे, प्रकाश बोराडे, प्रवीण देशमुख, संजय गोराडे, योगेश वरखेडे, योगेश मुळाने, कल्पेश बोराडे, श्रीराम बोराडे, अजय बोराडे आदींची उपस्थिती होती.
महिला सुरक्षेच्या दृष्टीने हा उपक्रम अत्यंत महत्त्वाचा ठरत असून, मोठ्या संख्येने मुलींनी या प्रशिक्षणाचा लाभ घ्यावा, असे आवाहन आयोजकांकडून करण्यात आले आहे. सामाजिक बांधिलकी जपत राबविण्यात आलेल्या या उपक्रमाचे सर्वत्र कौतुक होत आहे.
