मुक्ताईनगर प्रतिनिधी :
मुक्ताईनगर येथे आत्महत्या करण्याच्या विचारात असलेल्या परप्रांतीय युवकाला जागरूक पत्रकारांच्या सतर्कतेमुळे जीवनदान मिळाल्याची घटना समोर आली आहे.
याबाबत सविस्तर वृत्त असे की, पश्चिम बंगाल येथील रहिवासी असलेला विश्वजीत मोंटू उराव (वय १८) हा युवक कामानिमित्त मुक्ताईनगर येथे आला होता. घरगुती तणावामुळे तो आत्महत्या करण्याच्या उद्देशाने बसस्थानक परिसरातील मुख्य रस्त्यावर रात्री सुमारे १० वाजता झोपलेला असल्याचे स्थानिक ‘मंडे टू मंडे न्यूज’चे पत्रकार अक्षय काठोके आणि त्यांचे मित्र सुमित काचकूटे यांच्या निदर्शनास आले.
यांनी तात्काळ गाडी थांबवून युवकाची विचारपूस केली असता त्याने आत्महत्या करण्याचा विचार व्यक्त केला. परिस्थितीची गंभीरता लक्षात घेऊन त्यांनी विलंब न करता त्या युवकाला आपल्या वाहनात बसवून थेट मुक्ताईनगर पोलीस स्टेशनमध्ये नेले.
पोलीस स्टेशनमध्ये उपस्थित असलेले पोलीस अंमलदार अजय खंडेराव आणि कर्मचारी दीपक ढाकरे यांनी युवकाची समजूत काढत त्याची सविस्तर चौकशी केली. त्यानंतर मुक्ताईनगर शहरातील त्याचे मित्र व नातेवाईकांना बोलावून त्याच्या स्वाधीन करण्यात आले.
स्थानिक पत्रकारांच्या तत्परतेमुळे आणि पोलिसांच्या योग्य हस्तक्षेपामुळे एका तरुणाचे प्राण वाचले असून या घटनेबद्दल सर्वत्र कौतुक व्यक्त केले जात आहे.
