पिंपरी पेंढार (प्रतिनिधी) : ग्रामदैवत मळगंगा माता व मुक्ताई माता यांच्या यात्रेनिमित्त दि. १२ व १३ एप्रिल २०२६ रोजी आयोजित यात्रा उत्सव मोठ्या उत्साहात आणि पारंपरिक वातावरणात संपन्न झाला.
यात्रेची सुरुवात सकाळी मांडव डहाळे आणि त्यांच्या भव्य मिरवणुकीने झाली. ग्रामस्थांनी पारंपरिक वाद्यांच्या गजरात आणि जल्लोषात सहभाग घेतला. यात्रा उत्सवानिमित्त बैलगाडा शौकिनांसाठी बैलगाडा शर्यतीचे आयोजन करण्यात आले होते. या शर्यतीत प्रथम क्रमांक पटकावणाऱ्या गाड्यास सुमारे ७१ हजार रुपयांचे बक्षीस देण्यात आले.
संध्याकाळी शेरणीची मिरवणूक व प्रसाद वाटप करण्यात आले. तसेच काठी आणि छबीना मिरवणुकीत ग्रामस्थांचा उत्स्फूर्त सहभाग पाहायला मिळाला. रात्री ११ वाजता आनंद लोकनाट्य तमाशाचा रंगतदार कार्यक्रम सादर करण्यात आला.
दुसऱ्या दिवशी सकाळी हजेरी कार्यक्रम पार पडला. दुपारी ३ नंतर कुस्त्यांच्या जंगी आखाड्याचे आयोजन करण्यात आले होते. या आखाड्यात विविध जिल्ह्यांतील पैलवानांनी सहभाग घेतला. प्रथम क्रमांक मिळवणाऱ्या पैलवानास ढाल देऊन सन्मानित करण्यात आले.
दोन दिवस चाललेल्या या यात्रा उत्सवात ग्रामस्थांची मोठ्या प्रमाणावर उपस्थिती लाभली. पारंपरिक धार्मिक विधी, सांस्कृतिक कार्यक्रम आणि क्रीडा स्पर्धांच्या संगमातून हा उत्सव उत्साहात आणि यशस्वीपणे पार पडला.
