रायगड (प्रतिनिधी) : पेण तालुक्यातील सिद्धार्थ नगर, गागोदे खुर्द येथे Dr. B. R. Ambedkar यांच्या १३५ व्या जयंतीनिमित्त भव्य कार्यक्रमाचे आयोजन करण्यात आले. ग्रामस्थ, सिद्धार्थ तरुण मित्र मंडळ आणि रमाई महिला मंडळ यांच्या संयुक्त विद्यमाने हा जयंती महोत्सव मोठ्या उत्साहात पार पडला.
कार्यक्रमाला प्रमुख पाहुणे म्हणून ग्रामपंचायत गागोदे खुर्दचे माजी सरपंच तथा भाजपा नेते शिवाजी पाटील यांची उपस्थिती होती. तसेच उपसरपंच जनार्दन जोशी, लक्ष्मण सताणे, केतन तनपूरे, विजय पाटील, महेश पाटील, सतीश पाटील, पोलीस पाटील सौ. निकिता सताणे, नरेश सताणे आणि गावातील नागरिक मोठ्या संख्येने उपस्थित होते.
कार्यक्रमाच्या अध्यक्षपदी लक्ष्मण सताणे यांची निवड करण्यात आली. यावेळी बौद्धाचार्य नरेश सताणे व सौ. निकिता सताणे यांनी बौद्ध पूजन विधी पार पाडला. भिमगीत सादरीकरण, तसेच विविध मान्यवरांचे मनोगत यामुळे कार्यक्रमाला विशेष रंगत आली.
यावेळी शिवाजी पाटील यांनी गागोदे खुर्द येथे Dr. B. R. Ambedkar यांचे भव्य स्मारक उभारण्यात येणार असल्याची अधिकृत घोषणा केली. स्मारकासाठी आवश्यक जागेची व्यवस्था करण्यात आली असून आमदार निधी किंवा शासकीय निधीतून काम पूर्ण करून पुढील वर्षी १३६ व्या जयंतीनिमित्त उद्घाटन करण्याचा मानस त्यांनी व्यक्त केला.
कार्यक्रमाच्या शेवटी अध्यक्ष लक्ष्मण सताणे यांनी उपस्थितांचे आभार मानले. तसेच सर्व उपस्थितांना अल्पोपहार देऊन कार्यक्रमाची सांगता करण्यात आली.
