दौंड (प्रतिनिधी) : तालुक्यातील मळद येथे महामानव Dr. B. R. Ambedkar यांच्या जयंतीनिमित्त विविध कार्यक्रमांचे आयोजन करण्यात येऊन उत्सव मोठ्या उत्साहात आणि चैतन्यमय वातावरणात साजरा करण्यात आला. संपूर्ण गावात आनंदाचे वातावरण पाहायला मिळाले.
सकाळी ९ वाजता ग्रामपंचायत स्तरावर कार्यक्रमांना सुरुवात झाली. मळद येथील समाजमंदिरात ग्रामसेवकांच्या हस्ते बाबासाहेबांच्या प्रतिमेचे पूजन करण्यात आले. त्यानंतर अत्यंत शिस्तबद्ध पद्धतीने सामूहिक बुद्धवंदना घेण्यात आली.
यानंतर ग्रामपंचायत कार्यालयात शासकीय पूजन पार पडले. येथेही बुद्धवंदना करून बाबासाहेबांना अभिवादन करण्यात आले. ‘जय भीम’च्या घोषणांनी संपूर्ण परिसर दुमदुमून गेला होता.
या कार्यक्रमाला अमर मित्र मंडळाचे पदाधिकारी व सदस्य, ग्रामपंचायतीचे सर्व सदस्य, तसेच गावातील नागरिक व युवक मोठ्या संख्येने उपस्थित होते.
मळद पंचक्रोशीत आंबेडकरी विचारांचा वारसा जपत दरवर्षीप्रमाणे यंदाही हा उत्सव शांततेत, एकात्मतेच्या वातावरणात आणि सामाजिक सलोखा राखत साजरा करण्यात आला.
