अंबाजोगाई(प्रतिनिधी)-
आगामी खरीप हंगामाच्या पार्श्वभूमीवर शेतकऱ्यांना कोणत्याही अडचणी येऊ नयेत, यासाठी आमदार नमिता मुंदडा यांनी पंचायत समिती केज येथे आयोजित ‘तालुकास्तरीय खरीप हंगामपूर्व आढावा’ बैठकीत प्रशासनाला कडक निर्देश दिले आहेत. यावेळी महाडीबीटी (MahaDBT) योजनेअंतर्गत पात्र लाभार्थ्यांना ट्रॅक्टर व इतर कृषी साहित्याचे वाटपही त्यांच्या हस्ते करण्यात आले.
पाऊस कमी पडण्याचा अंदाज; नियोजनासाठी जनजागृतीवर भर
भारतीय हवामान विभागाने (IMD) २०२६ मध्ये मान्सून सरासरीपेक्षा कमी राहण्याचा अंदाज वर्तवला आहे. या पार्श्वभूमीवर, आमदार मुंदडा यांनी शेतकऱ्यांनी योग्य पिकांची निवड करावी आणि पेरणीचे योग्य नियोजन करावे, यासाठी कृषी विभागाने प्रभावी जनजागृती करण्याचे निर्देश दिले.
आ. नमिता मुंदडा यांनी प्रशासनाला दिलेल्या महत्त्वाच्या सूचना:
बियाणे व खतांचा साठा: शेतकऱ्यांना दर्जेदार बियाणे आणि खतांचा तुटवडा भासू नये. तसेच खतांची लिंकिंग किंवा काळाबाजार करणाऱ्यांवर गुन्हे दाखल करण्याच्या सूचना त्यांनी दिल्या.
पीक विमा व कर्ज वितरण: खरीप २०२५ चा थकीत विमा मिळवून देण्यासाठी शासन स्तरावर पाठपुरावा सुरू असल्याचे सांगतानाच, पीक कर्ज वितरणात विलंब करणाऱ्या बँकांवर कारवाई करण्याचे संकेत त्यांनी दिले.
अखंडित वीज पुरवठा: खरीप हंगामात म्हणजेच जून ते सप्टेंबर या काळात शेतीसाठी नियमित आणि अखंडित वीज पुरवठा सुनिश्चित करण्याबाबत महावितरणला आदेश देण्यात आले.
अनुदान व योजनांची अंमलबजावणी: महाडीबीटी अंतर्गत प्रलंबित असलेले ठिबक, शेततळे आणि पशुधन योजनांचे अनुदान त्वरित पात्र शेतकऱ्यांच्या खात्यावर वर्ग करण्याबाबत त्यांनी दक्षता घेण्यास सांगितले.
AgriStack (Farmer ID): शेतकरी नोंदणीतील त्रुटी त्वरित दुरुस्त करून ही प्रक्रिया गतिमान करण्याच्या सूचना यंत्रणेला दिल्या.
शेतकऱ्यांना कृषी साहित्याचे वाटप
या बैठकीचे औचित्य साधून आ. नमिता मुंदडा यांच्या हस्ते महाडीबीटी योजनेतून ट्रॅक्टर व विविध कृषी अवजारांचे वितरण करण्यात आले. आधुनिक यंत्रसामग्रीचा वापर करून शेतकऱ्यांनी आपली शेती अधिक प्रगत करावी, असे आवाहन त्यांनी यावेळी केले.
या आढावा बैठकीस नायब तहसीलदार, गटविकास अधिकारी, तालुका कृषी अधिकारी, सर्व कृषी सहाय्यक आणि संबंधित विभागाचे अधिकारी-कर्मचारी मोठ्या संख्येने उपस्थित होते.
