पनवेल/ कळंबोली : ता. प्रतिनिधी
कळंबोली शहरामध्ये तरुणांमध्ये अमली पदार्थांच्या सेवनाचे प्रमाण चिंताजनकरीत्या वाढले असून अनेक युवक मृत्युमुखी पडल्याच्या घटना समोर येत आहेत. पोलीस विभागामार्फत सातत्याने कारवाई करून या प्रकारांना आळा घालण्याचा प्रयत्न होत असला तरी ही समस्या पूर्णपणे संपलेली नाही, ही वस्तुस्थिती आहे.
अलीकडेच मुंबईतील NESCO सेंटर येथे झालेल्या लाईव्ह कॉन्सर्टमध्ये अतिरिक्त ड्रग्स सेवनामुळे काही तरुणांचा मृत्यू झाल्याची अत्यंत दुर्दैवी घटना ताजी असताना, कळंबोली येथे दिनांक २५ एप्रिल 2026 रोजी भूमी गार्डनिया, रोडपाली स्पोर्ट्स ग्राउंड, सेक्टर-17 या ठिकाणी *“Royal Stag Boom Box” तर्फे भव्य लाईव्ह कॉन्सर्ट आयोजित करण्यात येत आहे.
अशा प्रकारच्या कार्यक्रमांमध्ये मोठ्या प्रमाणावर नशेचे पदार्थ वापरले जाण्याची शक्यता नाकारता येत नाही. त्यामुळे पुन्हा अशाच घटना घडण्याचा धोका निर्माण झाला आहे. यामुळे कळंबोली शहराची प्रतिमा मलिन होण्याची तसेच कायदा व सुव्यवस्थेचा प्रश्न निर्माण होण्याची शक्यता आहे.
कळंबोली शहराला गालबोट लागू नये, तरुण पिढीचे भवितव्य सुरक्षित राहावे आणि शहरात कायदा-सुव्यवस्था अबाधित राहावी यासाठी सदर कार्यक्रमास पोलिस प्रशासनाने परवानगी देऊ नये अशी मागणी कळंबोली मधील नागरिकांकडून करण्यात येत आहे.
तसेच कळंबोली मधील सर्व नगरसेवक, सर्व पक्षीय नेते आणि सामाजिक संस्था या सर्वांनी एकत्र येऊन हा कार्यक्रम रद्द करण्यासाठी या “Royal stag Boom Box” लाईव्ह कॉन्सर्ट विरोधात आवाज उठविण्याचे आवाहन करण्यात येत आहे.
