धडगाव (प्रतिनिधी) :
धडगाव तालुक्यातील असली ते अस्तंभा या महत्त्वाच्या रस्त्याच्या दुरवस्थेबाबत नागरिकांमध्ये तीव्र नाराजी व्यक्त होत असून या रस्त्याचे तात्काळ खडीकरण व डांबरीकरण करण्यात यावे, अशी मागणी बिरसा फायटर्स नंदुरबार संघटनेकडून करण्यात आली आहे.
या संदर्भात संघटनेच्या वतीने Public Works Department Shahada चे कार्यकारी अभियंता यांना निवेदन देण्यात आले. यावेळी राज्याध्यक्ष गोपाल भंडारी, राष्ट्रीय कोषाध्यक्ष पप्पू अवाया, जगदीश पावरा यांच्यासह कार्यकर्ते उपस्थित होते.
मिळालेल्या माहितीनुसार, असली–अस्तंभा रस्ता सुमारे ८ वर्षांपूर्वी मंजूर झाला असला तरी प्रत्यक्षात काम झालेले नाही. हा रस्ता नंदुरबार जिल्ह्याचे खासदार Gowaal Padavi तसेच माजी आदिवासी विकास मंत्री K C Padavi यांच्या गावाशी संबंधित असूनही रस्त्याची अत्यंत दयनीय अवस्था झाली आहे.
सध्या रस्त्यावर मोठ्या प्रमाणात खड्डे पडले असून “रस्त्यात खड्डा की खड्ड्यात रस्ता” अशी परिस्थिती निर्माण झाली आहे. त्यामुळे वाहनधारक, प्रवासी तसेच भाविकांना मोठा त्रास सहन करावा लागत आहे. अस्तंभा देवस्थानाकडे जाणाऱ्या लाखो भाविकांची वर्दळ या रस्त्यावर असते, मात्र खराब अवस्थेमुळे अनेकजण ये-जा टाळत असल्याचे चित्र आहे.
खड्डेमय रस्त्यामुळे अपघाताचे प्रमाण वाढले असून गरोदर महिला, वृद्ध आणि आजारी नागरिकांसाठी प्रवास धोकादायक ठरत आहे. गेल्या अनेक वर्षांपासून रस्त्याच्या कडेला खडी टाकून ठेवली असली तरी प्रत्यक्ष काम सुरू झालेले नाही, असा आरोप करण्यात आला आहे.
रस्त्याचे तात्काळ खडीकरण व डांबरीकरण करण्यात यावे, अन्यथा तीव्र आंदोलन छेडण्यात येईल, असा इशारा बिरसा फायटर्स संघटनेने प्रशासनाला दिला आहे.
