📰
उमरगा :.
राष्ट्रीय मौखिक आरोग्य कार्यक्रमांतर्गत येथील डॉ. रामानुजन इंग्लिश स्कूलमध्ये दंत तपासणी शिबिराचे आयोजन करण्यात आले.
या शिबिराचे आयोजन जिल्हा कार्यक्रम प्रमुख डॉ. धनंजय चाकूरकर (जिल्हा शल्य चिकित्सक, धाराशिव) तसेच डॉ. कोमल गरड (वैद्यकीय अधिकारी, उपजिल्हा रुग्णालय उमरगा) यांच्या मार्गदर्शनाखाली पार पडले.
शिबिरात उपजिल्हा रुग्णालयातील दंत शल्य चिकित्सक डॉ. स्वप्नाली लामतुरे यांनी प्रमुख भूमिका बजावली. त्यांना शिवाई इन्स्टिट्यूट ऑफ नर्सिंग, उमरगा येथील प्रा. शाहबाज शेख तसेच अंकिता सु., संस्कृती करपे, वैष्णवी क्षीरसागर, अनुष्का साळुंके, गणेश आंधळे आणि अथर्व केदार या टीम सदस्यांचे मोलाचे सहकार्य लाभले.
शिबिरादरम्यान एकूण १८० विद्यार्थ्यांच्या दातांची तपासणी करण्यात आली. तसेच विद्यार्थ्यांना दातांची स्वच्छता, योग्य पद्धतीने ब्रश करण्याची सवय आणि दंत आरोग्याची योग्य काळजी कशी घ्यावी याबाबत मार्गदर्शन करण्यात आले.
यावेळी शाळेच्या मुख्याध्यापिका गंगा अंबर तसेच शिक्षकवृंद उपस्थित होते. या शिबिरामुळे विद्यार्थ्यांमध्ये दंत आरोग्याबाबत जागरूकता निर्माण झाली.
