प्रतिनिधी (प्रकाश झोडे) दिनांक 14/4/2026
हिंगणघाट, दि. १४ एप्रिल: भारतरत्न डॉ. बाबासाहेब आंबेडकर यांच्या जयंतीनिमित्त हिंगणघाट शहरात विविध ठिकाणी मोठ्या उत्साहात कार्यक्रमांचे आयोजन करण्यात आले. शहरातील अनेक वॉर्डांमधून भव्य रॅली काढण्यात आल्या असून जयभीमच्या घोषणांनी संपूर्ण परिसर दुमदुमून गेला.
यावेळी विविध सामाजिक, शैक्षणिक व युवक मंडळांच्या वतीने बाबासाहेबांच्या प्रतिमेला पुष्पहार अर्पण करून अभिवादन करण्यात आले. शहरातील विविध शाळांमध्येही डॉ. आंबेडकर जयंती उत्साहात साजरी करण्यात आली.
शाळांमध्ये आयोजित कार्यक्रमांदरम्यान मुख्याध्यापक व शिक्षकांनी विद्यार्थ्यांना डॉ. बाबासाहेब आंबेडकर यांच्या जीवनकार्य, संविधान निर्मितीतील योगदान तसेच शिक्षण, समता आणि सामाजिक न्याय यावरील विचारांचे महत्त्व पटवून दिले. विद्यार्थ्यांनीही भाषणे, गीत व सांस्कृतिक कार्यक्रमांच्या माध्यमातून बाबासाहेबांना अभिवादन केले.
संपूर्ण शहरात उत्साह, शिस्त आणि सामाजिक एकतेच्या वातावरणात डॉ. बाबासाहेब आंबेडकर जयंती मोठ्या जल्लोषात पार पडली.
