मापोली (प्रतिनिधी):
कोलतावडे येथील श्री गोविंद लक्ष्मण शेळके माजी सरपंच यांची कन्या कुमारी प्राजक्ता गोविंद शेळके हिने महाराष्ट्र लोकसेवा आयोगाच्या (MPSC) परीक्षेत दैदीप्यमान यश संपादन केले आहे. तिची ‘राजपत्रित गटविकास अधिकारी’ (BDO – Class 1) पदी निवड झाल्याने आंबेगावच्या पश्चिम भागात आनंदाचे वातावरण पसरले असून तिच्यावर कौतुकाचा वर्षाव होत आहे.
महाराष्ट्र लोकसेवा आयोगामार्फत घेण्यात आलेल्या राज्यसेवा परीक्षेत प्राजक्ताने पहिल्याच प्रयत्नात हे यश मिळवले आहे. अत्यंत चिकाटी, जिद्द आणि कठोर परिश्रमाच्या जोरावर तिने हे शिखर सर केले आहे. ग्रामीण भागातील विद्यार्थ्यांनी जिद्द ठेवली तर ते प्रशासकीय सेवेत उच्च पदावर पोहोचू शकतात, हेच प्राजक्ताने आपल्या यशातून सिद्ध करून दाखवले आहे.
तिच्या या यशाबद्दल श्री गणेश मंदिर विश्वस्त मंडळ मापोली आणि कोलतावडे ग्रामस्थांकडून आनंद व्यक्त केला जात आहे. “प्राजक्ताने केवळ शेळके परिवाराचेच नव्हे, तर संपूर्ण आदिवासी भागाचे नाव अभिमानाने उंचावले आहे. तिची ही निवड ग्रामीण भागातील इतर विद्यार्थ्यांसाठी प्रेरणादायी ठरेल,” अशा भावना ग्रामस्थांनी व्यक्त केल्या आहेत.
प्राजक्ताच्या या यशाबद्दल तिचे सर्व स्तरातून अभिनंदन होत असून तिच्या पुढील वाटचालीस शुभेच्छा दिल्या जात आहेत.
