बोराळे (ता. मंगळवेढा) : आंबेडकर जयंतीनिमित्त जीवन ज्योत बहुउद्देशीय संस्था, बोराळे यांच्या वतीने विविध सामाजिक व प्रेरणादायी कार्यक्रमांचे आयोजन करण्यात आले.
कार्यक्रमाची सुरुवात भगवान गौतम बुद्ध, महामानव डॉ. बाबासाहेब आंबेडकर आणि महात्मा ज्योतिराव फुले यांच्या प्रतिमांचे पूजन करून करण्यात आली. त्यानंतर उपस्थित मान्यवरांचा सत्कार करण्यात आला.
या कार्यक्रमासाठी प्रमुख उपस्थिती म्हणून सौ. सुमया लतीफ तांबोळी यांनी उपस्थित राहून मार्गदर्शन केले.
यावेळी बोराळे गावचे सरपंच विनोद पाटील, गणेश जी गावकरी (माजी सरपंच), नूतन हायस्कूलचे वाघमारे सर, संजय तेली सर, जीवन ज्योत फाउंडेशनचे संस्थापक अध्यक्ष चनवीर लंगोटे, बापू घोडके, लखन स्वामी, प्रकाश वाघमारे सर, अजित मुंगसे, सुनील पाटील, प्रवीण कोरे, शिवानंद पाटील, पत्रकार अशोक सुतार, सतीश वाघमारे, कोंडीबा वाघमारे आदींसह ग्रामस्थ मोठ्या संख्येने उपस्थित होते.
या प्रसंगी जीवन ज्योत फाउंडेशनच्या वतीने लहान मुलांना वह्या व पेनचे वाटप करण्यात आले. तसेच “शिका, संघटित व्हा आणि संघर्ष करा” या डॉ. बाबासाहेब आंबेडकर यांच्या विचारांचा संदेश देत विद्यार्थ्यांना शिक्षणाचे महत्त्व पटवून देण्यात आले.
डॉ. बाबासाहेब आंबेडकर हे केवळ संविधान निर्माते नव्हते, तर ते सामाजिक न्याय, समता आणि शिक्षणाचे खरे शिल्पकार होते. शिक्षण हेच खरे शस्त्र असून त्याच्या बळावर माणूस स्वतःचे व समाजाचे भविष्य बदलू शकतो, असा संदेश त्यांच्या कार्यातून स्पष्टपणे दिसून येतो. अन्यायाविरुद्ध लढा देत समतेचा मार्ग दाखवणारे ते युगपुरुष होते. त्यांच्या विचारांमुळे आजही तरुणांना प्रेरणा मिळत असून समाजात सकारात्मक बदल घडविण्याची उर्मी निर्माण होत आहे.
हा उपक्रम समाजात समता, बंधुता व शिक्षणाची जाणीव निर्माण करणारा ठरला.
