🚨 एका महिन्यात दुसरा भीषण अपघात; पूरडी हेटी (ता. गोंडपिपरी) येथे रेती ट्रॅक्टरखाली दबून तरुणाचा मृत्यू – आदिवासी टायगर सेनेच्या पुढाकाराने ५ लाखांची मदत 🚨
प्रतिनिधि / आकाश गेडाम
पूरडी हेटी (ता. गोंडपिपरी) येथे एका महिन्याच्या आत दुसरा भीषण ट्रॅक्टर अपघात घडल्याने परिसरात भीतीचे वातावरण निर्माण झाले आहे. मारोती गणपती शेडमाके यांचा रेती वाहतूक करणाऱ्या ट्रॅक्टरखाली दबून जागीच मृत्यू झाला.
घटनेची माहिती मिळताच आदिवासी टायगर सेनेचे पदाधिकारी साईनाथ कोडापे, प्रदीप कुलमेथे, मनीषा मडावी तसेच तालुका अध्यक्ष गणेश कोवे यांच्या नेतृत्वाखाली मोठ्या संख्येने महिला पदाधिकारी घटनास्थळी दाखल झाल्या. यात चंदा आत्राम (तालुका अध्यक्ष), शुभांगी शेडमाके, सीमा सिडाम, शोभा सिडाम, छाया शेडमाके, वनिता पंधरे, ज्योती मंगाम, अर्चना पेंदोर, सुरेखा आत्राम, सरिता गेडाम, अनुराधा कुलमेथे, पर्वता शेडमाके आदींचा समावेश होता.
या सर्व पदाधिकाऱ्यांनी तात्काळ पुढाकार घेत मृताच्या कुटुंबियांच्या मदतीसाठी धाव घेतली व शासनाकडून ५ लाख रुपयांचा निधी मिळवून दिला.
दरम्यान, अवघ्या १५ दिवसांपूर्वी याच गावात अशाच प्रकारचा अपघात झाला होता. त्या घटनेत दोन आदिवासी पुरुष ट्रॅक्टरखाली आले होते, ज्यात एकाचा मृत्यू झाला तर एक जण गंभीर जखमी झाला होता.
वारंवार घडणाऱ्या या अपघातांमुळे स्थानिक नागरिकांमध्ये तीव्र संताप व्यक्त होत असून, प्रशासनाने तात्काळ योग्य ती उपाययोजना करावी, अशी मागणी जोर धरत आहे.
