पाचोड (ता. पैठण) येथील शिवछत्रपती कला, वाणिज्य व विज्ञान महाविद्यालयाचे प्राचार्य डॉ. चंद्रसेन कोठावळे यांना शैक्षणिक क्षेत्रातील उल्लेखनीय कार्याबद्दल ‘महाराष्ट्र भूषण’ या प्रतिष्ठित पुरस्काराने सन्मानित करण्यात आले आहे. ‘आनंदी युनिव्हर्स फाउंडेशन’तर्फे हा पुरस्कार नुकताच पुणे येथे आयोजित समारंभात प्रदान करण्यात आला.
डॉ. कोठावळे यांनी शिक्षण क्षेत्रात केलेल्या नाविन्यपूर्ण कामगिरीची दखल घेत हा सन्मान देण्यात आला. महाविद्यालयात त्यांनी विविध शैक्षणिक, सांस्कृतिक आणि सामाजिक उपक्रम राबवले असून विद्यार्थ्यांच्या सर्वांगीण विकासासाठी त्यांनी विशेष प्रयत्न केले आहेत. अध्ययन व अध्यापन पद्धतीमध्ये आधुनिक तंत्रज्ञानाचा वापर, विद्यार्थीकेंद्रित उपक्रम आणि गुणवत्तापूर्ण शिक्षण देण्यावर त्यांनी भर दिला आहे.
पुणे येथे झालेल्या पुरस्कार वितरण सोहळ्यात मान्यवरांच्या उपस्थितीत गणेश विटकर आणि तेजस्विनी दिवटे यांच्या हस्ते डॉ. कोठावळे यांना सन्मानचिन्ह व प्रमाणपत्र प्रदान करण्यात आले. या सोहळ्यास विविध क्षेत्रातील मान्यवर उपस्थित होते.
डॉ. कोठावळे यांच्या या यशाबद्दल श्री ज्ञानेश्वर बहुउद्देशीय सेवाभावी संस्थेचे संस्थापक सचिव खासदार संदिपानजी भुमरे, पैठणचे आमदार विलास बापू भुमरे, पैठण कृषी उत्पन्न बाजार समितीचे सभापती राजू नाना भुमरे, जिल्हा परिषद सदस्य शिवराज भैय्या भुमरे, जिजा पाटील भुमरे, राहुल नारळे, उपप्राचार्य डॉ.शिवाजी यादव डॉ. सुरेश नलावडे डॉ.विलास महाजन डॉ.संतोष चव्हाण डॉ.सुभाष पोटभरे डॉ.गांधी बानायत डॉ.हेमंत कुमार जैन प्रा.विनोद कांबळे प्रा.सचिन कदम यांच्यासह महाविद्यालयातील प्राध्यापक व कर्मचाऱ्यांनी त्यांचे अभिनंदन केले.
या सन्मानामुळे महाविद्यालयाच्या शैक्षणिक कार्याला अधिक प्रेरणा मिळणार असून, भविष्यातही विद्यार्थ्यांच्या प्रगतीसाठी अशाच नाविन्यपूर्ण उपक्रमांची अंमलबजावणी करण्यात येईल, असा विश्वास व्यक्त करण्यात येत आहे.
