‘
पाथरी (प्रतिनिधी) अहमद अन्सारी पाथरी परभणी
शेतकऱ्यांच्या अपघाती मृत्यू झाल्यास त्यांच्या कुटुंबियांना आर्थिक आधार देण्यासाठी राबविण्यात येणाऱ्या ‘गोपीनाथ मुंडे शेतकरी अपघात सानुग्रह अनुदान योजना’ अंतर्गत प्रस्ताव मंजुरीसाठी तहसील कार्यालय पाथरी येथे आज दुपारी १२ वाजता महत्त्वपूर्ण बैठक पार पडली.
तहसीलदार श्री. शंकर एन. हांदेशवार यांच्या अध्यक्षतेखाली झालेल्या या बैठकीत एकूण ७ प्रस्ताव सादर करण्यात आले होते. त्यापैकी सर्व आवश्यक कागदपत्रांची पूर्तता झालेल्या २ प्रस्तावांना अंतिम मंजुरी देण्यात आली. तर अपूर्ण कागदपत्रे आणि विविध त्रुटींमुळे उर्वरित ५ प्रस्ताव नामंजूर करण्यात आले.
या बैठकीस सदस्य सचिव तथा तालुका कृषी अधिकारी श्री. गोविंद कोल्हे, बीडीओ प्रतिनिधी म्हणून विस्तार अधिकारी (कृषी) श्री. संदीपान घुंबरे, आरोग्य विभागाचे प्रतिनिधी श्री. राजू गिराम, आरटीओ प्रतिनिधी श्री. शुभम अकुलवार, तसेच उप कृषी अधिकारी श्री. एस. एस. उगले यांच्यासह समितीचे इतर सदस्य उपस्थित होते.
सदर योजनेअंतर्गत शेतकऱ्यांचा अपघाती मृत्यू झाल्यास त्यांच्या वारसांना महाराष्ट्र शासनाकडून रु. २ लाखांचे सानुग्रह अनुदान देण्यात येते. मात्र, लाभ मिळवण्यासाठी आवश्यक सर्व कागदपत्रांची पूर्तता करणे अत्यावश्यक असल्याचे या बैठकीत स्पष्ट करण्यात आले.
प्रस्ताव मंजुरी प्रक्रियेत पारदर्शकता राखत पात्र लाभार्थ्यांना तातडीने मदत मिळावी, यासाठी प्रशासन कटिबद्ध असल्याचे यावेळी अधोरेखित करण्यात आले.
