आमदार, नगराध्यक्ष, माजी नगराध्यक्ष व समिती अध्यक्षांची प्रमुख उपस्थिती
एरंडोल प्रतिनिधी/ तुषार शिंपी : भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांच्या जयंतीनिमित्त एरंडोल येथे मंगळवार, १४ एप्रिल २०२६ रोजी विविध कार्यक्रमांचे उत्साहात आयोजन करण्यात आले. मोटरसायकल रॅली, जयघोष आणि भव्य मिरवणुकीमुळे संपूर्ण शहरात उत्साहाचे वातावरण निर्माण झाले.
सकाळी मान्यवरांच्या उपस्थितीत डॉ. बाबासाहेब आंबेडकर यांच्या प्रतिमेस माल्यार्पण करून अभिवादन करण्यात आले.
यावेळी आमदार अमोल पाटील, नगराध्यक्ष डॉ. नरेंद्र ठाकूर, उपनगराध्यक्षा सुनिता माळी, प्रांताधिकारी मनीषकुमार गायकवाड, तहसीलदार गोपाळ पाटील, मुख्याधिकारी अमोल बागुल, पोलीस निरीक्षक निलेश गायकवाड,भारतीय जनता पक्षाचे संघटन मंत्री किशोर काळकर,प्रा.मनोज पाटील,आनंद दाभाडे,अतुल महाजन,यांसह अनेक मान्यवर उपस्थित होते.
यानंतर युवा कार्यकर्त्यांनी शहरातून मोटरसायकल रॅली काढत “जय भीम” च्या घोषणांनी वातावरण दणाणून सोडले.
माजी उपनगराध्यक्ष शालिग्राम गायकवाड यांच्या हस्ते रॅलीचे उद्घाटन करण्यात आले.
संध्याकाळी वाजतगाजत डॉ. बाबासाहेब आंबेडकर यांच्या प्रतिमेची भव्य मिरवणूक काढण्यात आली. शहरातील विविध ठिकाणी प्रतिमेचे पूजन करण्यात आले. वाद्यांच्या तालावर युवकांचा उत्स्फूर्त सहभाग पाहायला मिळाला. सामाजिक सलोख्याचे दर्शन घडवत हजारो नागरिकांनी या मिरवणुकीत सहभाग नोंदवला.बाबासाहेब आंबेडकर चौक परिसर अनुयायांनी फुलून गेला होता. या कार्यक्रमात सर्वपक्षीय, सामाजिक व वैद्यकीय क्षेत्रातील मान्यवर मोठ्या संख्येने सहभागी झाले.
माल्यार्पण प्रसंगी माजी नगराध्यक्ष देविदास महाजन,खडके सिम हायस्कूलचे चेअरमन जगदीश पाटील, ॲड.ओम त्रिवेदी, राजेश पाटील, बाळासाहेब पाटील,पी.जी.पाटील, डॉ.संग्राम पाटील, डॉ.बाबा बोहरी, किशोर निंबाळकर, सतीश पाटील आदी मान्यवर उपस्थित होते.
कार्यक्रमाच्या यशस्वी आयोजनासाठी माजी उपनगराध्यक्ष शालिग्राम गायकवाड, डॉ.आंबेडकर जयंती उत्सव समितीचे अध्यक्ष लखन बनसोडे, उपाध्यक्ष प्रवीण बागुल,मयुर अहिरे, प्रविण बाविस्कर, समितीचे कोषाध्यक्ष संघरत्न गायकवाड,मोहन सैंदाणे, सुरेश सोनवणे, अनील पाटील,प्रा.भरत शिरसाठ,प्रा.संदीप कोतकर, डॉ.अतुल सोनवणे, रणजित मोरे, भैय्या अहिरे, मनोहर बोडरे,रवि बोरसे,प्रा.नरेंद्र गायकवाड व इतर कार्यकर्त्यांनी परिश्रम घेतले.
