तळेगाव रोही (प्रतिनिधी) : भारतरत्न डॉ. बाबासाहेब आंबेडकर जयंती उत्सव २०२६ निमित्त ज्ञानदीप परिवारातर्फे आयोजित सामान्य ज्ञान परीक्षा व भव्य वक्तृत्व स्पर्धेचा निकाल जाहीर करून बक्षीस वितरण व सत्कार समारंभ मोठ्या उत्साहात पार पडला.
हा कार्यक्रम संत ज्ञानेश्वर माध्यमिक व उच्च माध्यमिक विद्यालय तळेगाव रोही येथे आयोजित करण्यात आला होता. यावेळी विद्यालयाची माजी विद्यार्थिनी कु. नूतन विष्णु भोकनळ यांची नाशिक ग्रामीण पोलीस दलात निवड झाल्याबद्दल विशेष सत्कार करण्यात आला.
कार्यक्रमाच्या अध्यक्षस्थानी माजी सैनिक रमेश पाटील होते. त्यांनी नूतन यांच्या संघर्षमय प्रवासाचे व यशोगाथेचे प्रभावी वर्णन केले. कार्यक्रमाचे सूत्रसंचालन रमेश आहिरे यांनी केले.
या कार्यक्रमास मुख्याध्यापक नरोटे सर, पोलीस पाटील अविनाश आहिरे, तंटामुक्ती समिती अध्यक्ष संतोष पाटील, शालेय शिक्षण समिती अध्यक्ष शिवराम पाटील, मनमाड पोलीस स्टेशनचे हवालदार राजेंद्र केदारे यांसह अनेक मान्यवर उपस्थित होते. तसेच गावातील पालकवर्ग व शिक्षणप्रेमी नागरिक मोठ्या संख्येने सहभागी झाले होते.
ज्ञानदीप परिवाराच्या या उपक्रमामुळे विद्यार्थ्यांमध्ये स्पर्धात्मकता वाढीस लागून शिक्षणाबाबत प्रेरणा मिळाल्याची भावना उपस्थितांनी व्यक्त केली.
