आजरा (प्रतिनिधी):
आजरा शहरात संयुक्त शिवजयंती सोहळा पारंपरिक पद्धतीने आणि उत्साहात साजरा करण्यात आला. सकाळपासूनच शहरात शिवजन्मोत्सवाचा जल्लोष पाहायला मिळाला.
सकाळी शिवतीर्थ येथे शिवजन्मोत्सवाचे आयोजन करण्यात आले. यावेळी महिला व शिवप्रेमींनी छत्रपती शिवाजी महाराजांचा पाळणा गाऊन वातावरण शिवमय केले. विविध शिवकालीन गीतांच्या सादरीकरणाने कार्यक्रमाला विशेष रंगत आली.
सायंकाळी शहरातून भव्य मिरवणूक काढण्यात आली. नगराध्यक्ष अशोक चराटी यांच्या हस्ते छत्रपती शिवरायांच्या प्रतिमेचे पूजन करून मिरवणुकीचा शुभारंभ करण्यात आला. यावेळी उपनगराध्यक्षा पूजा डोंगरे, नगरसेवक व अनेक मान्यवर मोठ्या संख्येने उपस्थित होते.
मिरवणुकीत ‘वाघाची तालीम मंडळा’च्या सवाद्य मिरवणुकीने विशेष आकर्षण ठरले. ढोल-ताशांच्या गजरात आणि शिवरायांच्या जयघोषात संपूर्ण शहर दुमदुमले होते. मोठ्या संख्येने नागरिक सहभागी झाल्याने आजरा शहरात आनंदाचे आणि उत्साहाचे वातावरण निर्माण झाले.
