आजरा | प्रतिनिधी
आजरा शहरात महागाव रोड परिसरात घडलेल्या भीषण दुर्घटनेत घराची भिंत अंगावर कोसळून एका शिक्षिका व एका विद्यार्थिनीचा दुर्दैवी मृत्यू झाला, तर एक महिला गंभीर जखमी झाली आहे. या घटनेमुळे शहरात शोककळा पसरली असून नागरिकांमध्ये संतापाची लाट उसळली आहे.
मिळालेल्या माहितीनुसार, एका जुन्या घराची भिंत जेसीबीच्या साहाय्याने पाडण्याचे काम सुरू असताना कोणतीही सुरक्षा उपाययोजना न करता काम करण्यात येत होते. सकाळी सुमारे १० वाजताच्या सुमारास अचानक भिंत रस्त्यावरून जाणाऱ्यांच्या अंगावर कोसळली. या दुर्घटनेत प्रा. ज्योती नितीन कुंभार (४२) व कु. वैष्णवी तुकाराम भोसले (१४) यांचा जागीच मृत्यू झाला, तर श्रीमती ललिता भोसले (४५) या गंभीर जखमी झाल्या आहेत.
घटनेची माहिती मिळताच स्थानिक प्रशासन व पोलीस घटनास्थळी दाखल झाले. जखमींना तत्काळ रुग्णालयात हलविण्यात आले. दरम्यान, या प्रकरणी निष्काळजीपणामुळे दोन निष्पाप जीवांचा बळी गेल्याचा ठपका ठेवत मुख्य कंत्राटदार, सब-कंत्राटदार व जेसीबी चालकाविरुद्ध गुन्हा दाखल करण्यात आला आहे.
या घटनेनंतर परिसरातील नागरिकांनी संताप व्यक्त करत दोषींवर कठोर कारवाईची मागणी केली आहे. तसेच, अशा कामांदरम्यान सुरक्षेच्या नियमांचे काटेकोर पालन करावे, अशी मागणीही जोर धरत आहे.
