दापोली | प्रतिनिधी
रत्नागिरी जिल्ह्यातील दापोली तालुक्यातील उटंबर-केळशी परिसरात स्थानिक तरुण कृष्णा श्रावण पाटील यांच्या पुढाकारातून ‘दर्या दौलत फिशिंग टुरिझम’ हा आगळावेगळा उपक्रम सुरू झाला आहे. पारंपरिक कोळी संस्कृती जपत पर्यटकांना समुद्रातील जीवनाचा प्रत्यक्ष अनुभव देण्याचा या उपक्रमाचा मुख्य उद्देश आहे.
कोकणात येणारे पर्यटक सहसा डॉल्फिन सफरीपुरते मर्यादित राहतात. मात्र, या उपक्रमामुळे पर्यटकांना प्रत्यक्ष मासेमारी प्रक्रिया, मच्छीमारांचे दैनंदिन जीवन आणि समुद्रातील कष्ट यांचा जवळून अनुभव घेण्याची संधी मिळत आहे. “खरा कोकण” अनुभव देण्याच्या संकल्पनेवर हा उपक्रम आधारित आहे.
सुमारे ३० वर्षांचा अनुभव असलेल्या तज्ज्ञांच्या मार्गदर्शनाखाली पर्यटकांना स्वतः मासेमारी करण्याची संधी दिली जात असून, हेच या उपक्रमाचे खास आकर्षण ठरत आहे. सुरक्षिततेच्या दृष्टीने लाईफ जॅकेट, लाईफ बॉय यांसारख्या सुविधा उपलब्ध करून देण्यात आल्या आहेत.
भरती-ओहोटीच्या वेळेनुसार सफरीचे नियोजन केले जात असल्याने, पर्यटकांनी बुकिंगनंतर दिलेल्या वेळेनुसार उपस्थित राहणे आवश्यक असल्याचे आयोजकांनी स्पष्ट केले आहे.
या उपक्रमामुळे स्थानिक युवकांना रोजगाराच्या नव्या संधी उपलब्ध होत असून, कोकणातील पर्यटन क्षेत्राला एक वेगळा आणि सकारात्मक आयाम मिळण्याची अपेक्षा व्यक्त केली जात आहे.
