सेलू, दि. २२ एप्रिल :
सेलू शहरातील घोराड परिसरातील सोनिया नगर येथे आवारा श्वानाच्या हल्ल्यात ४ वर्षीय बालक गंभीर जखमी झाल्याची धक्कादायक घटना घडली आहे. दीपांशू महेश गुरपंच (वय ४) हा आपल्या घराजवळ खेळत असताना अचानक एका आवारा श्वानाने त्याच्यावर हल्ला केला. या हल्ल्यात तो गंभीर जखमी झाला असून, त्याच्या आरडाओरडीनंतर परिसरातील नागरिकांनी तातडीने धाव घेत त्याला श्वानाच्या तावडीतून सोडवले.
जखमी अवस्थेत दीपांशूला तातडीने कस्तुरबा रुग्णालय, सेवाग्राम येथे दाखल करण्यात आले असून, गेल्या आठ दिवसांपासून त्याच्यावर उपचार सुरू आहेत. त्याची प्रकृती चिंताजनक असल्याची माहिती मिळत आहे.
दरम्यान, घोराड व आसपासच्या परिसरात मागील काही महिन्यांपासून आवारा श्वानांची संख्या मोठ्या प्रमाणात वाढली असून नागरिकांमध्ये भीतीचे वातावरण निर्माण झाले आहे. या समस्येकडे स्थानिक प्रशासनाकडून दुर्लक्ष होत असल्याचा आरोप नागरिकांकडून केला जात आहे.
या पार्श्वभूमीवर आवारा श्वानांचा बंदोबस्त करण्यासाठी तात्काळ ठोस उपाययोजना कराव्यात, अशी जोरदार मागणी नागरिकांनी केली आहे.
