परभणी / प्रतिनिधी
गुरुवार, दि. २८ मे रोजी बकरी ईदनिमित्त परभणी शहरातील विविध भागांमध्ये सामूहिक ईदची विशेष नमाज मोठ्या धार्मिक आणि शांततापूर्ण वातावरणात अदा करण्यात आली. ईदगाह मैदान, धाररोड अमिनसाब बाबा दर्गा मैदान, दर्गारोड परिसरातील मैदान तसेच साखला प्लॉट पिंपळगड परिसर येथे मुस्लिम बांधव मोठ्या संख्येने उपस्थित होते.
यावेळी परभणी शहर महानगरपालिकेच्या वतीने महापौर सय्यद इकबाल आणि मनपा आयुक्त नितीन नार्वेकर यांनी मौलाना जहीर अब्बास व मुफ्ती मोहम्मद गौसुद्दीन कासमी यांची गळाभेट घेऊन ईदच्या शुभेच्छा दिल्या. समाजात बंधुभाव, शांतता आणि सौहार्द कायम राहावे, असा संदेशही यावेळी देण्यात आला.
या प्रसंगी पोलीस अधीक्षक पंकज कुमावत, तहसीलदार संदीप राजापुरे, सहाय्यक आयुक्त अल्केश देशमुख, मुख्य स्वच्छता निरीक्षक विकास रत्नपारखे, लक्ष्मण जोगदंड, जनसंपर्क अधिकारी राजकुमार जाधव, भांडारपाल रामेश्वर कुलकर्णी, रमेश चव्हाण, खोले, कुणाल भारसाखळे आदी मान्यवर उपस्थित होते. सर्व उपस्थित अधिकारी आणि लोकप्रतिनिधींनी मुस्लिम बांधवांची गळाभेट घेत त्यांना ईद सणाच्या शुभेच्छा दिल्या.
दरम्यान, ईदच्या सामूहिक नमाज पठणासाठी परभणी महानगरपालिकेच्या वतीने चोख व्यवस्था करण्यात आली होती. सर्व नमाज स्थळांवर नागरिकांसाठी पिण्याच्या पाण्याची सुविधा उपलब्ध करून देण्यात आली होती तसेच स्वच्छतेची विशेष काळजी घेण्यात आली होती. त्यामुळे ईदचा सण शांततेत, उत्साहात आणि सामाजिक सलोखा जपत पार पडला.
