सिंधुदुर्ग जिल्ह्यातील रुग्णांची गोवा बांबोळी रुग्णालयात कोणतीही गैरसोय होणार नाही: केंद्रीय मंत्री श्रीपाद नाईक
सामाजिक कार्यकर्ते अतुल बंगे यांनी मानले केंद्रीय मंत्र्यांचे आभार
धारगळ येथील ‘आयुष’ रुग्णालयाचा सिंधुदुर्गातील जनतेला मोठा फायदा
प्रतिनिधी: आजरा
सिंधुदुर्ग जिल्ह्यातून गोवा बांबोळी येथील रुग्णालयात (Goa Medical College – GMC) उपचारासाठी येणाऱ्या रुग्णांना आजवर सर्वोत्तम सेवा देण्यात आली आहे आणि यापुढेही त्यांची कोणतीही गैरसोय होणार नाही, अशी ग्वाही केंद्रीय वाणिज्य व वीज राज्यमंत्री ना. श्रीपाद नाईक यांनी दिली आहे. सिंधुदुर्गातील सामाजिक कार्यकर्ते श्री. अतुल बंगे यांनी नुकतीच गोव्यातील निवासस्थानी ना. नाईक यांची सदिच्छा भेट घेतली, त्यावेळी त्यांनी हे आश्वासन दिले.
सिंधुदुर्ग आणि गोवा यांच्यातील जिव्हाळ्याच्या संबंधांवर बोलताना ना. श्रीपाद नाईक म्हणाले, “गोवा आणि सिंधुदुर्ग जिल्ह्याचे नाते पिढ्यानपिढ्यांचे आहे. सिंधुदुर्गातून अनेक गंभीर रुग्ण बांबोळी येथे उपचारासाठी येतात. ‘बांबोळीत पेशंट गेला की तो बरा होऊनच परतणार’, हा रुग्णांचा आणि त्यांच्या नातेवाईकांचा विश्वास आम्ही कायम राखणार आहोत.”
’अतुल बंगे यांच्यासारख्या निस्वार्थी कार्यकर्त्याची गरज’
सिंधुदुर्गातून बांबोळी येथे येणाऱ्या अनेक रुग्णांचे नातेवाईक येथील सामाजिक कार्यकर्ते अतुल बंगे यांच्याशी संपर्क साधतात. त्यानंतर श्री. बंगे थेट केंद्रीय मंत्री श्रीपाद नाईक यांच्या कार्यालयाशी किंवा भ्रमणध्वनीद्वारे संपर्क साधून रुग्णांना मदत मिळवून देतात.
या जनसेवेचे कौतुक करताना ना. नाईक म्हणाले,
”श्री. अतुल बंगे हे माझ्या सतत संपर्कात असतात. स्वतः पदरमोड करून, रुग्णसेवेसाठी अहोरात्र धडपडणारा हा निस्वार्थी सामाजिक कार्यकर्ता आहे. त्यांची ही जनसेवा पाहूनच एक लोकप्रतिनिधी म्हणून मी नेहमीच सहकार्याचा हात पुढे करतो.”
यावेळी अतुल बंगे यांनी सिंधुदुर्गातील रुग्णांना गोव्यात मिळणाऱ्या सातत्यपूर्ण सहकार्याबद्दल केंद्रीय मंत्री ना. श्रीपाद नाईक यांचे विशेष आभार मानले.
गोव्यातील ‘आयुष’ रुग्णालयाचा सिंधुदुर्गाला मोठा लाभ
ना. श्रीपाद नाईक यांनी त्यांच्या आयुष मंत्रीपदाच्या कार्यकाळातील आठवणींना उजाळा दिला. ते म्हणाले, “मी आयुष मंत्री असताना गोवा-धारगळ येथे ‘आयुष आयुर्वेद महाविद्यालय व रुग्णालय’ उभे केले. आज या ठिकाणी अवघ्या १० रुपयांत आयुर्वेदिक औषधे आणि उपचार दिले जातात. याचा सर्वाधिक फायदा सिंधुदुर्ग जिल्ह्यातील गरीब व गरजू रुग्णांना होत आहे.” तसेच, सिंधुदुर्ग जिल्ह्यातही लवकरच ‘आयुष’ ओपीडी (OPD) सुरू करण्यासाठी आपला पाठपुरावा सुरू असल्याचे त्यांनी यावेळी आवर्जून सांगितले.
