मुसारणे ग्रामपंचायतीवर भाजपचा झेंडा! परप्रांतीयांना दाखले देणाऱ्या सरपंच श्रीमती राजश्री राजेश सातवी पदमुक्त
वाडा:
स्थानिक ग्रामस्थांना हक्काचे दाखले नाकारून परप्रांतीयांना बेकायदेशीरपणे दाखले दिल्याप्रकरणी मुसारणे ग्रामपंचायतीच्या सरपंच श्रीम. राजश्री राजेश सातवी यांना विभागीय आयुक्तांनी पदमुक्त केले आहे. या कारवाईमुळे मुसारणे ग्रामपंचायतीवर आता भारतीय जनता पार्टीचा (भाजप) झेंडा फडकला असून, उपसरपंच श्रीम. कामिनी किरण घोडविंदे यांच्याकडे सरपंच पदाचा अतिरिक्त कारभार सोपवण्यात आला आहे.मुसारणे येथील स्थानिक ग्रामस्थ नियमित कर भरूनही त्यांना दाखले देण्यास ग्रामपंचायतीकडून टाळाटाळ केली जात होती. या मनमानी कारभाराविरोधात ग्रामपंचायत सदस्य योगेश लहू गायकर यांनी तत्कालीन
पालकमंत्री श्री. रवींद्र चव्हाण यांच्या जनता दरबारात तक्रार केली होती. वरिष्ठ पातळीवर झालेल्या चौकशीत, हे दाखले देताना मासिक सभा किंवा ग्रामसभेची कोणतीही मंजुरी घेतली नसल्याचे आणि ग्रामपंचायत दप्तरी दाखल्यांची कोणतीही आवक-जावक नोंद नसल्याचे उघड झाले.या गंभीर प्रशासकीय चुकीमुळे विभागीय आयुक्तांनी महाराष्ट्र ग्रामपंचायत अधिनियम १९५८ चे कलम ३९(१) अंतर्गत सरपंचांना निष्कासित केले. गट विकास अधिकारी वैभव शिंदे यांच्या आदेशानुसार आता उपसरपंच कामिनी घोडविंदे पुढील निवडणूक होईपर्यंत सरपंच पदाचा कारभार सांभाळतील.
