वालूज महानगर प्रतिनिधी : जाकिर शाह
वालूज महानगर परिसरात मुस्लिम समाजाचा पवित्र सण ईद-उल-अजहा (बकरी ईद) गुरुवारी अत्यंत उत्साहात, धार्मिक वातावरणात आणि शांततेत साजरा करण्यात आला. पहाटेपासूनच मुस्लिम बांधवांमध्ये उत्साहाचे वातावरण पाहायला मिळाले. लहान मुलांपासून ते ज्येष्ठ नागरिकांपर्यंत सर्वांनी नवीन व पारंपरिक पोशाख परिधान करून ईदगाह मैदान तसेच विविध मोठ्या संख्येने उपस्थिती दर्शवली.
वालूज येथील मुख्य ईदगाह मैदानावर सकाळी हजारो मुस्लिम बांधवांच्या उपस्थितीत सामूहिक नमाज अदा करण्यात आली. नमाजपूर्वी धर्मगुरूंनी ईद-उल-अजहाचे महत्त्व, त्याग, बलिदान, मानवता आणि बंधुभाव याविषयी मार्गदर्शन केले. इस्लाम धर्म हा शांतता, प्रेम आणि सामाजिक ऐक्याचा संदेश देणारा धर्म असल्याचे यावेळी सांगण्यात आले.
नमाजनंतर देशात सुख, शांती, समृद्धी आणि भाईचारा कायम राहावा तसेच सर्व समाजात एकोपा निर्माण व्हावा यासाठी अल्लाह दरबारी विशेष सामूहिक प्रार्थना करण्यात आली. यावेळी मुस्लिम बांधवांनी एकमेकांना मिठी मारून ईदच्या शुभेच्छा दिल्या. तसेच विविध समाजातील नागरिकांनीही मुस्लिम समाजाला शुभेच्छा देत सामाजिक सलोखा आणि ऐक्याचे दर्शन घडवले.
ईदच्या निमित्ताने परिसरात आनंदाचे आणि उत्साहाचे वातावरण निर्माण झाले होते. अनेक ठिकाणी गरीब व गरजू नागरिकांना मदतीचा हात देण्यात आला. समाजातील बंधुभाव आणि मानवतेचा संदेश देणारा हा सण वालूज परिसरात अत्यंत शांततेत आणि उत्साहपूर्ण वातावरणात पार पडला.
या संपूर्ण कार्यक्रमादरम्यान वालूज पोलिसांनी अत्यंत चोख बंदोबस्त ठेवत नागरिकांना मोठे सहकार्य केले. वाहतूक व्यवस्था, सुरक्षा आणि शांतता राखण्यासाठी पोलिस प्रशासन सतत सतर्क होते. मुस्लिम बांधवांसह सर्व नागरिकांनी वालूज पोलिसांच्या कार्याचे कौतुक करत त्यांचे मनःपूर्वक अभिनंदन केले.
यावेळी परिसरातील समाजसेवक, धर्मगुरू, ग्रामस्थ आणि विविध क्षेत्रातील मान्यवर मोठ्या संख्येने उपस्थित होते..
