एनआयएची देशभर धाड; वाळूजमधील संशयित ताब्यात
दहशतवादी कारवायांचा कट उधळण्याच्या तपासात मोठी कारवाई; चार राज्यांतील १२ ठिकाणी एकाच वेळी शोधमोहीम
वाळूज, प्रतिनिधी (जाकिर शाह) : राष्ट्रीय तपास संस्था (एनआयए)ने देशात दहशतवादी कारवाया घडवून आणण्याच्या कथित कटाचा तपास तीव्र करत शुक्रवारी महाराष्ट्रासह उत्तर प्रदेश, राजस्थान आणि बिहार या चार राज्यांमध्ये व्यापक शोधमोहीम राबविली. या कारवाईत एकूण १२ ठिकाणी एकाच वेळी छापे टाकण्यात आले. त्यामध्ये छत्रपती संभाजीनगर जिल्ह्यातील वाळूज परिसराचाही समावेश असून एका संशयिताला चौकशीसाठी ताब्यात घेण्यात आल्याची माहिती अधिकृत सूत्रांकडून देण्यात आली.
शुक्रवारी पहाटे एनआयएचे विशेष पथक अचानक वाळूज परिसरातील शिवाजीनगर भागात दाखल झाले. स्थानिक पोलिसांच्या मदतीने संबंधित घराला घेराव घालून सखोल तपासणी करण्यात आली. या कारवाईदरम्यान परिसरात मोठा पोलिस बंदोबस्त तैनात करण्यात आला होता. एनआयएचे अधिकारी अनेक तास घरामध्ये तपास करत होते. त्यामुळे परिसरातील नागरिकांमध्ये उत्सुकता आणि चर्चेला उधाण आले होते.
तपासादरम्यान मोबाईल फोन, लॅपटॉप, हार्ड डिस्क, पेन ड्राइव्हसह विविध डिजिटल उपकरणे आणि काही महत्त्वाची कागदपत्रे जप्त करण्यात आल्याची माहिती समोर आली आहे. जप्त करण्यात आलेल्या साहित्याचे फॉरेन्सिक विश्लेषण करण्यात येणार असून त्यातून संशयिताच्या संपर्कातील व्यक्ती, आर्थिक व्यवहार आणि इतर हालचालींबाबत महत्त्वाची माहिती मिळण्याची शक्यता आहे.
बनावट आधारकार्ड सापडल्याची माहिती
सूत्रांच्या माहितीनुसार, संशयिताजवळ काही बनावट आधारकार्ड आणि इतर ओळखपत्रे आढळून आली आहेत. तसेच मोबाईल तपासणीत परदेशातील काही व्यक्ती आणि संस्थांशी संपर्क तसेच आर्थिक व्यवहारांबाबत संशयास्पद माहिती मिळाल्याचे सांगण्यात येत आहे. या माहितीची पडताळणी एनआयएकडून सुरू असून तपासाच्या दृष्टीने त्याला महत्त्वाचे मानले जात आहे.
चार राज्यांत समन्वित छापेमारी
एनआयएने उत्तर प्रदेशातील पाच, राजस्थान आणि बिहारमधील प्रत्येकी दोन तसेच महाराष्ट्रातील तीन ठिकाणी एकाच वेळी शोधमोहीम राबविली. या कारवाईत विविध कागदपत्रे, डिजिटल पुरावे आणि इलेक्ट्रॉनिक उपकरणे जप्त करण्यात आली आहेत. तपास यंत्रणा या सर्व साहित्याची बारकाईने छाननी करत आहेत.
स्थानिक पोलिसांचा कडेकोट बंदोबस्त
कारवाईदरम्यान वाळूज पोलिस ठाण्याचे अधिकारी, कर्मचारी तसेच शहर पोलिसांचे वरिष्ठ अधिकारी घटनास्थळी उपस्थित होते. कोणताही अनुचित प्रकार घडू नये यासाठी परिसरात कडेकोट बंदोबस्त ठेवण्यात आला होता. पोलिसांनी नागरिकांना अफवांवर विश्वास न ठेवण्याचे आवाहन केले.
दरम्यान, एनआयएच्या या कारवाईमुळे वाळूज परिसरासह संपूर्ण जिल्ह्यात खळबळ उडाली असून तपासातून आणखी काही धक्कादायक माहिती समोर येण्याची शक्यता व्यक्त केली जात आहे. संबंधित प्रकरणाचा तपास सध्या सुरू असून अधिकृत माहितीची प्रतीक्षा आहे.
– जाकिर शाह, वाळूज प्रतिनिधी
