चांदवड प्रतिनिधी :
चांदवड तालुक्यातील शेतकरी कुटुंबातील सुपुत्र श्री गणेश निंबाळकर यांना त्यांच्या सामाजिक, शैक्षणिक व संशोधन क्षेत्रातील उल्लेखनीय कार्याची दखल घेत प्रतिष्ठेचा ‘प्रबंध भूमी महाराष्ट्र रत्न’ पुरस्कार प्रदान करण्यात आला आहे. त्यांच्या या यशामुळे परिसरात आनंदाचे वातावरण निर्माण झाले असून विविध स्तरांतून त्यांच्यावर अभिनंदनाचा वर्षाव होत आहे.
शेतकरी कुटुंबातून पुढे येत त्यांनी जिद्द, मेहनत आणि चिकाटीच्या जोरावर विविध क्षेत्रात आपला वेगळा ठसा उमटवला आहे. ग्रामीण भागातील विद्यार्थ्यांसाठी प्रेरणादायी ठरणाऱ्या त्यांच्या कार्याची दखल घेत हा मानाचा पुरस्कार जाहीर करण्यात आला.
पुरस्कार प्राप्त झाल्यानंतर गणेश निंबाळकर यांनी हा सन्मान आपल्या आई-वडिलांसह शेतकरी बांधवांना समर्पित केला. ग्रामीण भागातील युवकांनी शिक्षण, संशोधन आणि सामाजिक कार्याच्या माध्यमातून प्रगती साधावी, असे आवाहन त्यांनी यावेळी केले.
त्यांच्या या यशाबद्दल सामाजिक, शैक्षणिक, राजकीय तसेच विविध क्षेत्रातील मान्यवरांनी शुभेच्छा दिल्या आहेत. चांदवड तालुक्याच्या शिरपेचात मानाचा तुरा खोवणाऱ्या या सन्मानामुळे परिसरातील युवकांना नवी प्रेरणा मिळाली असल्याची भावना नागरिकांनी व्यक्त केली.
शेतकरी कुटुंबातील युवकाने मिळविलेला हा सन्मान चांदवड तालुक्यासाठी अभिमानास्पद ठरला असून, गणेश निंबाळकर यांच्या पुढील वाटचालीसाठी सर्व स्तरांतून शुभेच्छा व्यक्त करण्यात येत आहेत.
