जळकोट प्रतिनिधी | दि. 29 मे 2026
जळकोट शहर व जळकोट पोलिस स्टेशनच्या वतीने दि. 29 मे 2026 रोजी भव्य रक्तदान शिबिराचे आयोजन करण्यात आले. लातूर जिल्ह्याचे पोलीस अधीक्षक अमोल तांबे यांच्या संकल्पनेतून हा सामाजिक उपक्रम राबविण्यात आला. या उपक्रमास नागरिकांचा उत्स्फूर्त प्रतिसाद लाभला.
सदर रक्तदान शिबिराचे आयोजन रोटरी क्लब ऑफ लातूर मिडटाऊन तसेच इंडियन रेडक्रॉस सोसायटी संचलित डॉ. भालचंद्र ब्लड बँक, लातूर यांच्या सौजन्याने करण्यात आले होते. समाजोपयोगी कार्याबरोबरच रस्ते सुरक्षा जनजागृतीचा संदेश देण्यासाठी रक्तदान करणाऱ्या प्रत्येक रक्तदात्यास हेल्मेट भेट स्वरूपात देण्यात आले.
रक्तदान आणि रस्ते सुरक्षेचा संगम घडवून आणणारा हा अभिनव उपक्रम जळकोट तालुक्यात विशेष चर्चेचा विषय ठरला आहे. “रक्तदान हे जीवनदान आहे” या संदेशासोबतच वाहन चालविताना हेल्मेटचा वापर करण्याबाबत जनजागृती करण्यात आली.
या शिबिरात जळकोट पोलिस स्टेशनचे सर्व अधिकारी व कर्मचारी, तालुक्यातील पोलीस पाटील, विविध सामाजिक संघटनांचे प्रतिनिधी तसेच नागरिकांनी मोठ्या संख्येने सहभाग नोंदविला. रक्तदानासाठी युवकांबरोबरच विविध वयोगटातील नागरिकांनी उत्साहाने प्रतिसाद दिला.
यावेळी पोलीस निरीक्षक श्रीराम माचेवाड यांनी रक्तदानाचे महत्त्व विशद करताना, “रक्तदान हे सर्वश्रेष्ठ दान असून एका रक्तदात्यामुळे अनेकांचे प्राण वाचू शकतात. समाजहितासाठी अशा उपक्रमांमध्ये नागरिकांनी पुढाकार घेणे आवश्यक आहे,” असे मत व्यक्त केले.
समाजोपयोगी व जनजागृतीपर उपक्रम राबविल्याबद्दल जळकोट पोलिस स्टेशनचे सर्व स्तरांतून कौतुक होत आहे. रक्तदान शिबिराला मिळालेला उत्स्फूर्त प्रतिसाद पाहता भविष्यातही अशा उपक्रमांचे आयोजन करण्यात यावे, अशी अपेक्षा नागरिकांनी व्यक्त केली.
रक्तदानाबरोबरच रस्ते सुरक्षेचा संदेश देणाऱ्या या उपक्रमाने सामाजिक बांधिलकीचे उत्तम उदाहरण घालून दिले असून जळकोट पोलिसांच्या या उपक्रमाचे सर्वत्र स्वागत होत आहे.
