काळी दौ | प्रतिनिधी
पुसद ग्रामीण पोलीस ठाण्याच्या हद्दीतील काळी दौ येथे गोवंशीय जनावराची अवैध कत्तल करून मांस कापले जात असल्याची गोपनीय माहिती पोलिसांना मिळाल्यानंतर करण्यात आलेल्या कारवाईत चार जणांना ताब्यात घेण्यात आले असून त्यांच्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, काळी दौ येथील एका घरात गोवंशीय जनावराची कत्तल सुरू असल्याची माहिती मिळाल्यानंतर पुसद ग्रामीण पोलिसांनी तातडीने छापा टाकला. या कारवाईदरम्यान चार जण गोवंशीय जनावराचे मांस कापताना आढळून आले. पोलिसांनी घटनास्थळावरून अंदाजे ६० किलो गोमांस जप्त केले असून त्याची किंमत सुमारे १२ हजार रुपये असल्याचे सांगण्यात आले आहे.
याशिवाय कत्तलीसाठी वापरण्यात येणारे साहित्यही पोलिसांनी जप्त केले. यात कुऱ्हाड, सुरे, इलेक्ट्रिक काटा तसेच इतर साहित्याचा समावेश आहे. जप्त करण्यात आलेल्या सर्व साहित्याची नोंद पंचनाम्यात करण्यात आली आहे.
या प्रकरणी पोलिसांनी मिर्झा अनस बेग, फरातुल्ला बेग मिर्झा, सुजात बेग जाकी बेग (रा. काळी दौ) तसेच मिर्झा मुजीब खाजा बेग (रा. वसनगर, पुसद) यांना ताब्यात घेतले आहे. संबंधित आरोपी गोवंशीय जनावराचे मांस कापत असताना आढळून आल्याने त्यांच्याविरुद्ध लागू कायद्यानुसार गुन्हा नोंदविण्यात आला आहे.
सदर कारवाई पोलीस अधीक्षक कुमार चैतन्य, अप्पर पोलीस अधीक्षक अशोक थोरात तसेच उपविभागीय पोलीस अधिकारी सिद्धेश्वर भोरे यांच्या मार्गदर्शनाखाली करण्यात आली. स्थानिक गुन्हे शाखा आणि पुसद ग्रामीण पोलीस ठाण्याच्या पथकाने संयुक्तरीत्या ही कारवाई पार पाडली.
या मोहिमेत ठाणेदार आशिष चौधरी, पोलीस उपनिरीक्षक राहुल देशमुख, पोलीस हेडकॉन्स्टेबल हनुमान गंगासागर, पोलीस नाईक नितीन आडे, पोलीस कर्मचारी उत्तम चव्हाण आणि इतर कर्मचाऱ्यांनी सहभाग घेतला. त्यांच्या तत्परतेमुळे ही कारवाई यशस्वी ठरली.
या प्रकरणाचा पुढील तपास पुसद ग्रामीण पोलीस करीत असून अवैध कत्तल प्रकरणामागील इतर बाबींचाही शोध घेतला जात आहे. पोलिसांच्या या कारवाईमुळे परिसरात खळबळ उडाली असून कायद्याचे उल्लंघन करणाऱ्यांविरुद्ध कठोर कारवाई केली जाईल, असा इशाराही प्रशासनाकडून देण्यात आला आहे.
