मुंबई (कांदिवली पश्चिम) | प्रतिनिधी :
उत्तर मुंबई धनगर समाज समितीच्या वतीने लोकमाता राजमाता पुण्यश्लोक अहिल्यादेवी होळकर यांच्या ३०० व्या जयंतीनिमित्त रविवार, दि. ३१ मे २०२६ रोजी विविध सामाजिक, सांस्कृतिक व धार्मिक कार्यक्रमांचे आयोजन करण्यात आले आहे. या जयंती उत्सवात समाजबांधवांनी मोठ्या संख्येने सहभागी व्हावे, असे आवाहन समितीचे संस्थापक अध्यक्ष निलेश मोटे यांनी केले आहे.
समितीच्या वतीने सकाळी १० वाजता कांदिवली पश्चिम येथील श्री रविशंकर शाळेसमोर पुण्यश्लोक अहिल्यादेवी होळकर यांच्या प्रतिमेचे पूजन करून कार्यक्रमाची सुरुवात होणार आहे. यानंतर सायंकाळी ५ वाजता बोरिवली देवीपाडा ते कुलूपवाडी मार्गे श्री रविशंकर शाळेपर्यंत भव्य दिव्य मिरवणूक काढण्यात येणार आहे. पारंपरिक वेशभूषा, ढोल-ताशांचा गजर, लेझीम पथक आणि समाजबांधवांच्या उत्स्फूर्त सहभागामुळे ही मिरवणूक आकर्षणाचा केंद्रबिंदू ठरणार आहे.
सायंकाळी ७ वाजता श्री रविशंकर शाळेसमोर सामाजिक व सांस्कृतिक कार्यक्रमांचे आयोजन करण्यात आले असून महाराष्ट्राच्या समृद्ध लोकपरंपरेचे दर्शन घडविणारे विविध सांस्कृतिक उपक्रम सादर करण्यात येणार आहेत. यामध्ये समाजातील विविध क्षेत्रांतील मान्यवर उपस्थित राहून पुण्यश्लोक अहिल्यादेवी होळकर यांच्या कार्याचा गौरव करणार आहेत.
पुण्यश्लोक अहिल्यादेवी होळकर या मानवतावादी, लोकहितवादी आणि कुशल प्रशासक म्हणून संपूर्ण देशात आदराने स्मरण केल्या जातात. त्यांच्या न्यायप्रिय कारभारामुळे आणि जनकल्याणकारी कार्यामुळे त्या भारतीय इतिहासातील एक आदर्श शासक म्हणून ओळखल्या जातात. त्यांच्या त्रिशताब्दी जयंतीनिमित्त देशभर विविध कार्यक्रमांचे आयोजन करण्यात येत असून सर्वत्र उत्साहाचे वातावरण आहे.
उत्तर मुंबई धनगर समाज समितीच्या वतीने आयोजित या जयंती उत्सवाला मोठ्या संख्येने उपस्थित राहून पुण्यश्लोक अहिल्यादेवी होळकर यांना विनम्र अभिवादन करावे, असे आवाहन करण्यात आले आहे. कांदिवली विभागातील ज्येष्ठ पत्रकार, साहित्यिक, गीतकार व सामाजिक कार्यकर्ते भारत कवितके यांनी देखील समाजबांधवांना या कार्यक्रमात सहभागी होण्याचे आवाहन केले आहे.
धनगर समाजाच्या एकात्मतेचे आणि सांस्कृतिक वारशाचे दर्शन घडविणारा हा जयंती उत्सव उत्साहपूर्ण वातावरणात संपन्न होणार असून समाजबांधवांमध्ये त्याबाबत मोठी उत्सुकता निर्माण झाली आहे.
