पुरंदर | प्रतिनिधी
सासवड येथील नगरपरिषदेच्या छत्रपती शिवाजी महाराज मार्केटच्या गजबजलेल्या आवारात गेल्या जवळपास १८ ते २० दिवसांपासून उभी असलेली बेवारस चारचाकी गाडी अखेर लोणी काळभोर परिसरातील असल्याची माहिती समोर आली आहे. या गाडीमुळे व्यापारी आणि नागरिकांमध्ये विविध चर्चांना उधाण आले होते.
मिळालेल्या माहितीनुसार, इकोस्पोर्ट प्रकारातील ही चारचाकी गाडी रविवारी, दि. १० मेपासून मार्केट परिसरात एकाच ठिकाणी उभी होती. अनेक दिवसांपासून गाडी हलविण्यात आली नसल्याने तसेच तिचा मालक कोण याची माहिती उपलब्ध नसल्यामुळे परिसरातील व्यापाऱ्यांमध्ये संभ्रमाचे वातावरण निर्माण झाले होते.
मार्केट परिसरात दररोज मोठ्या प्रमाणात नागरिकांची वर्दळ असते. अशा ठिकाणी बेवारस अवस्थेत वाहन उभे असल्याने सुरक्षेच्या दृष्टीनेही चिंता व्यक्त केली जात होती. त्यामुळे या वाहनाबाबत तातडीने चौकशी करण्याची मागणी स्थानिक व्यापाऱ्यांकडून करण्यात आली होती.
याबाबत स्थानिक व्यापारी अविनाश महाजन तसेच निरा बाजार समितीचे सभापती संदीप फडतरे यांनी सासवडचे पोलीस निरीक्षक कुमार कदम यांना माहिती दिली. त्यानंतर पोलिसांनी वाहनाची माहिती तपासून मालकाचा शोध घेण्यास सुरुवात केली.
प्राथमिक चौकशीत संबंधित इकोस्पोर्ट वाहन हे लोणी काळभोर परिसरातील असल्याचे निष्पन्न झाले आहे. वाहन मालकाशी संपर्क साधण्याचे प्रयत्न सुरू असून पुढील तपास पोलीस प्रशासनाकडून केला जात आहे.
सासवड पोलीस स्टेशनकडून मिळालेल्या माहितीनुसार, वाहनाची संपूर्ण माहिती पडताळून पाहिली जात असून ते मार्केट परिसरात इतक्या दिवसांपासून का उभे आहे, याचाही शोध घेतला जात आहे. वाहन मालकाची ओळख आणि त्यामागील कारण स्पष्ट झाल्यानंतर पुढील कार्यवाही करण्यात येणार आहे.
दरम्यान, पोलिसांच्या तत्परतेमुळे या बेवारस वाहनाबाबतचे गूढ काही प्रमाणात उलगडले असून, वाहन मालकाचा शोध पूर्ण होण्याकडे स्थानिक व्यापारी आणि नागरिकांचे लक्ष लागले आहे.
