अंबाजोगाई | प्रतिनिधी
स्वातंत्रवीर विनायक दामोदर सावरकर यांच्या जयंतीनिमित्त अंबाजोगाई येथे पेशवा प्रतिष्ठानच्या वतीने गरजू व गुणवंत विद्यार्थ्यांना प्रोत्साहन देण्याच्या उद्देशाने बिनव्याजी शैक्षणिक मदतीचे वाटप करण्यात आले. सामाजिक बांधिलकी जपत शिक्षणासाठी आर्थिक सहाय्य उपलब्ध करून देण्याचा उपक्रम प्रतिष्ठानकडून सातत्याने राबविण्यात येत आहे.
यावर्षीच्या शैक्षणिक मदत योजनेअंतर्गत पार्थ कानसुरकर यांना बिनव्याजी शैक्षणिक सहाय्य मंजूर करण्यात आले. यावेळी मान्यवरांच्या हस्ते त्यांना ५० हजार रुपयांचा धनादेश प्रदान करण्यात आला. उच्च शिक्षणासाठी आर्थिक मदत मिळाल्याने विद्यार्थ्याला शिक्षणाचा मार्ग अधिक सुलभ होणार असल्याचे मत उपस्थितांनी व्यक्त केले.
कार्यक्रमाच्या प्रारंभी स्वातंत्रवीर सावरकर यांच्या प्रतिमेला पुष्पहार अर्पण करून अभिवादन करण्यात आले. त्यांच्या राष्ट्रभक्ती, त्याग आणि समाजजागृतीच्या कार्याचा यावेळी गौरव करण्यात आला.
या कार्यक्रमास माजी गटशिक्षण अधिकारी व्यंकटेश कुलकर्णी, विवेक देशमुख, राहुल कुलकर्णी, महेश अकोलकर, शिरीष हिराळकर, संकेत तोरंबेकर, विवेक बाभुळगावकर, श्रीकांत जोशी, अक्षय देशमुख, केदार दामोशन, गौरव कुलकर्णी तसेच विलास कानसुरकर यांच्यासह अनेक मान्यवर उपस्थित होते.
यावेळी उपस्थितांनी शिक्षणाचे महत्त्व अधोरेखित करत गरजू विद्यार्थ्यांना मदतीचा हात देणे ही समाजाची जबाबदारी असल्याचे मत व्यक्त केले. आर्थिक अडचणींमुळे कोणत्याही विद्यार्थ्याचे शिक्षण थांबू नये, या उद्देशाने पेशवा प्रतिष्ठानकडून राबविण्यात येणारा हा उपक्रम कौतुकास्पद असल्याचेही मान्यवरांनी नमूद केले.
समाजातील होतकरू आणि गुणवंत विद्यार्थ्यांना शैक्षणिक क्षेत्रात प्रगतीची संधी मिळावी, यासाठी भविष्यातही अशा प्रकारच्या शैक्षणिक मदत योजना सुरू ठेवण्याचा निर्धार प्रतिष्ठानच्या पदाधिकाऱ्यांनी व्यक्त केला.
