भोर | प्रतिनिधी :
भोर तालुक्यासह कोकणाशी जोडणाऱ्या महत्त्वाच्या शिंदेवाडी-भोर-वरंधा ते महाड रस्त्याच्या कामाची आमदार शंकरभाऊ मांडेकर यांनी प्रत्यक्ष स्थळी जाऊन पाहणी केली. या महामार्गाच्या कामातील तांत्रिक अडचणी, प्रलंबित प्रश्न आणि शेतकऱ्यांच्या अडचणी जाणून घेत त्यांनी संबंधित अधिकाऱ्यांना आवश्यक सूचना दिल्या.
रस्त्याच्या कामाची पाहणी केल्यानंतर भोर पंचायत समितीच्या सभागृहात शेतकरी बांधव, प्रशासकीय अधिकारी आणि लोकप्रतिनिधी यांची संयुक्त बैठक आयोजित करण्यात आली. या बैठकीत प्रकल्पामुळे प्रभावित होणाऱ्या शेतकऱ्यांच्या समस्या, जमीन संपादनाशी संबंधित मुद्दे तसेच कामाच्या गतीबाबत सविस्तर चर्चा करण्यात आली.
आमदार मांडेकर यांनी या महत्त्वाकांक्षी प्रकल्पातील अडथळे दूर करून कामाला गती देण्यावर भर दिला. रस्त्याचे काम वेळेत आणि दर्जेदार पद्धतीने पूर्ण व्हावे यासाठी प्रशासनाने आवश्यक ती कार्यवाही तातडीने करावी, अशा स्पष्ट सूचना त्यांनी संबंधित विभागांना दिल्या.
या रस्त्यामुळे भोर, वरंधा घाट आणि महाड या भागांतील वाहतूक अधिक सुलभ होणार असून पर्यटन, व्यापार आणि स्थानिक विकासाला चालना मिळणार आहे. त्यामुळे प्रकल्पातील अडथळे लवकरात लवकर दूर करून काम पूर्ण करणे आवश्यक असल्याचे मत बैठकीत व्यक्त करण्यात आले.
यावेळी विकास खरात, पुणे जिल्हा परिषदेचे माजी उपाध्यक्ष रणजित शिवतरे, सभापती मनिषाताई कंक, नगराध्यक्ष रामचंद्र आवारे, उपसभापती विशाल कोंडे, तहसीलदार राजेंद्र नजन, गटविकास अधिकारी चंद्रकांत विपट, राष्ट्रवादी काँग्रेसचे अध्यक्ष संतोष घोरपडे, NHAI चे उपअभियंता कुलकर्णी, पंचायत समिती सदस्य राजेश बोडके, नगरसेवक कृणाल धुमाळ तसेच विविध विभागांचे अधिकारी, पदाधिकारी आणि शेतकरी बांधव उपस्थित होते.
बैठकीत उपस्थित शेतकऱ्यांनी आपल्या अडचणी मांडल्या. त्यावर सकारात्मक चर्चा करत संबंधित प्रश्न मार्गी लावण्यासाठी प्रशासन आणि लोकप्रतिनिधींनी समन्वयाने काम करण्याचे आश्वासन दिले.
या पाहणी दौऱ्यामुळे रस्ते प्रकल्पातील प्रलंबित प्रश्न सोडविण्यास मदत होणार असून शिंदेवाडी-भोर-वरंधा ते महाड या महत्त्वाच्या मार्गाच्या कामाला अधिक गती मिळण्याची अपेक्षा व्यक्त केली जात आहे.
