वर्धा | प्रतिनिधी
वर्धा शहरातील संघटित गुन्हेगारीला आळा घालण्यासाठी वर्धा पोलिसांनी कठोर पावले उचलत गेल्या तीन महिन्यांत तब्बल तीन गुन्हेगारी टोळ्यांविरुद्ध महाराष्ट्र संघटित गुन्हेगारी नियंत्रण अधिनियम (मकोका) अंतर्गत कारवाई केली आहे. या धडक मोहिमेमुळे शहरातील गुन्हेगारी प्रवृत्तींमध्ये खळबळ उडाली असून कायदा व सुव्यवस्था अधिक मजबूत करण्यासाठी पोलिस प्रशासनाने कठोर भूमिका घेतल्याचे स्पष्ट झाले आहे.
पोलिस अधीक्षक सौरभ कुमार अग्रवाल यांच्या मार्गदर्शनाखाली वर्धा शहर पोलिसांनी अट्टल गुन्हेगारांविरोधात विशेष मोहीम सुरू केली आहे. या मोहिमेअंतर्गत टोळीप्रमुख आयुष पुरुषोत्तम बावरे याच्यासह त्याचे साथीदार आकाश उर्फ डुडू पुरुषोत्तम परडेकर, कोहिनूर संजय उके आणि सौरभ उर्फ लल्ला राजेश यादव यांच्याविरुद्ध मकोका अंतर्गत कारवाई करण्यात आली आहे.
पोलिस तपासानुसार संबंधित टोळी अनेक वर्षांपासून शहर परिसरात सक्रिय असून मारहाण, खंडणी उकळणे, दहशत निर्माण करणे, जीवे मारण्याच्या धमक्या देणे, जबरी चोरी, गंभीर दुखापत करणे आणि इतर गंभीर स्वरूपाचे गुन्हे करण्यामध्ये सहभागी असल्याचे निष्पन्न झाले आहे. या टोळीविरुद्ध वर्धा शहर पोलीस ठाण्यात विविध गुन्हे दाखल असून भारतीय न्याय संहितेच्या विविध कलमान्वये कारवाई करण्यात आलेली आहे.
याचबरोबर दुसऱ्या एका प्रकरणात टोळीप्रमुख आसिफ उर्फ मोट्या शौकत अली शेखयात आणि त्याचा साथीदार नोशाद अली शौकत अली शेखयात यांच्याविरुद्धही मकोका अंतर्गत कारवाई करण्यात आली आहे. आर्थिक फायद्यासाठी दहशत निर्माण करणे, जबरदस्तीने पैसे उकळणे, मारहाण करणे, धमक्या देणे आणि इतर गंभीर गुन्ह्यांमध्ये त्यांचा सहभाग असल्याचा आरोप पोलिसांनी केला आहे.
पोलिसांनी संबंधित आरोपींचा गुन्हेगारी इतिहास, पूर्वी दाखल असलेले गुन्हे आणि उपलब्ध पुरावे यांचा सखोल अभ्यास करून मकोका प्रस्ताव वरिष्ठ अधिकाऱ्यांकडे सादर केला होता. आवश्यक मंजुरी मिळाल्यानंतर संबंधित आरोपींवर मकोका अंतर्गत कारवाई करण्यात आली.
वर्धा शहर पोलिसांच्या या सातत्यपूर्ण आणि कठोर कारवाईमुळे संघटित गुन्हेगारीला मोठा आळा बसण्याची अपेक्षा व्यक्त होत आहे. गुन्हेगारी प्रवृत्तींचा बंदोबस्त करून नागरिकांना सुरक्षित वातावरण उपलब्ध करून देण्यासाठी पोलिस प्रशासन कटिबद्ध असल्याचे या कारवाईतून दिसून येते.
पोलिस अधीक्षक सौरभ कुमार अग्रवाल यांच्या नेतृत्वाखाली उपविभागीय पोलीस अधिकारी आणि वर्धा शहर पोलीस ठाण्याच्या पथकाने ही कारवाई यशस्वीपणे पार पाडली. नागरिकांच्या सुरक्षिततेसाठी आणि संघटित गुन्हेगारीविरोधातील मोहिमेला अधिक गती देण्यासाठी अशा प्रकारच्या कठोर कारवाया भविष्यातही सुरू राहतील, असे पोलिस प्रशासनाने स्पष्ट केले आहे.
