कार्ले (प्रतिनिधी) : रविवार व सुट्टीचा दिवस असल्याने लोणावळा येथील प्रसिद्ध एकविरा आई कार्ले मंदिरात आज सकाळपासूनच भाविकांची मोठी गर्दी उसळली होती. पहाटे काकड आरतीच्या गजरात मंदिराचे दरवाजे भाविकांसाठी खुले करण्यात आले. काकड आरतीला उपस्थित राहण्यासाठीही मोठ्या संख्येने भाविकांनी गर्दी केली होती.
महाराष्ट्राच्या विविध भागांसह परराज्यातील हजारो भाविकांनी देवीच्या दर्शनासाठी मंदिर परिसरात हजेरी लावली. एकविरा आईच्या दर्शनासाठी मंदिराच्या पायऱ्यांवर व परिसरात लांबच लांब रांगा लागल्या होत्या. भाविकांनी देवीचे दर्शन घेऊन कुटुंबाच्या सुख-समृद्धीसाठी प्रार्थना केली.
“एकविरा आईच्या नावाने चांगभलं” या जयघोषाने संपूर्ण परिसर दुमदुमून गेला होता. मंदिर परिसरात सर्वत्र भक्तिमय वातावरण निर्माण झाले होते. गर्दीचे नियोजन करण्यासाठी मंदिर प्रशासन, पोलीस यंत्रणा तसेच स्वयंसेवकांनी विशेष व्यवस्था केली होती. त्यामुळे मोठ्या प्रमाणावर गर्दी असूनही दर्शन व्यवस्था सुरळीत सुरू होती.
उन्हाळ्याच्या सुट्ट्या आणि रविवारचा योग आल्याने दिवसभर भाविकांची संख्या वाढत राहण्याची शक्यता व्यक्त करण्यात येत आहे. एकविरा आईच्या दर्शनासाठी आलेल्या भाविकांमध्ये विशेष उत्साह व भक्तिभाव पाहायला मिळाला.
— सिद्धेश शिंदे, मुरुड तालुका प्रतिनिधी
