निलेश दाभाडे | नांदुरा प्रतिनिधी
नांदुरा तालुक्यातील शेंबा येथे कर्जबाजारीपणामुळे एका शेतकरी पुत्राने आत्महत्या केल्याची दुर्दैवी घटना घडली आहे. गोपाल रामदास करंकार (वय 24) यांनी 29 मे 2026 रोजी स्वतःचे जीवन संपविल्याची माहिती समोर आली आहे.
मिळालेल्या माहितीनुसार, गोपाल करंकार यांनी त्यांच्या गुरांच्या गोठ्यातील शेडमध्ये गळफास घेऊन आत्महत्या केली. कुटुंबीयांनी दिलेल्या माहितीनुसार, त्यांच्या आई मंदाबाई रामदास करंकार यांच्या नावावर बँकेचे कर्ज होते. आर्थिक अडचणी आणि कर्जाच्या तणावामुळे त्यांनी हे टोकाचे पाऊल उचलल्याचा प्राथमिक अंदाज व्यक्त केला जात आहे.
मृत गोपाल करंकार यांच्या पश्चात आई मंदाबाई रामदास करंकार, भाऊ प्रवीण करंकार आणि बहीण असा परिवार आहे. या घटनेमुळे शेंबा गावात हळहळ व्यक्त होत असून परिसरात शोककळा पसरली आहे.
दरम्यान, या घटनेची नोंद संबंधित पोलीस ठाण्यात करण्यात आली असून प्रकरणाचा पुढील तपास पोलीस प्रशासनाकडून सुरू आहे. आर्थिक संकटामुळे तरुण शेतकरी कुटुंबांवर येणारा ताण पुन्हा एकदा या घटनेच्या निमित्ताने समोर आला आहे.
