पुणे, दि. ३० मे २०२६ : भाविकांसाठी आनंदाची बातमी असून श्री क्षेत्र भीमाशंकर देवस्थान ट्रस्टने १५ जून २०२६ पासून भीमाशंकर मंदिर पुन्हा दर्शनासाठी खुले करण्यात येणार असल्याची घोषणा केली आहे. मंदिर परिसरातील विकासकामे पूर्ण झाल्यानंतर भाविकांना दर्शनाची सुविधा उपलब्ध करून देण्यात येणार आहे.
मंदिर बंद का ठेवण्यात आले होते?
नाशिक येथे २०२७ मध्ये होणाऱ्या सिंहस्थ कुंभमेळ्याच्या पार्श्वभूमीवर तसेच प्रयागराज महाकुंभ २०२५ मधील अनुभव लक्षात घेऊन भाविकांच्या वाढत्या गर्दीचे व्यवस्थापन करण्यासाठी मंदिर परिसरात नवीन सभामंडप आणि पायरी मार्गाचे बांधकाम हाती घेण्यात आले होते. त्यामुळे मंदिर ९ जानेवारी २०२६ पासून भाविकांसाठी बंद ठेवण्यात आले होते. ही मुदत ३१ मे २०२६ पर्यंत वाढविण्यात आली होती.
विक्रमी वेळेत पूर्ण झाले काम
साधारणपणे एक वर्ष लागणारे हे बांधकाम मंदिर प्रशासन, जिल्हा प्रशासन आणि विविध यंत्रणांच्या समन्वयातून अवघ्या पाच महिन्यांत पूर्ण करण्यात आले आहे. या कामामुळे भविष्यात मोठ्या संख्येने येणाऱ्या भाविकांना अधिक सुरक्षित आणि सुलभ दर्शन व्यवस्था उपलब्ध होणार आहे.
भाविकांसाठी महत्त्वाच्या सूचना
- दि. ५ जून २०२६ पासून ऑनलाईन नोंदणी सुरू होणार.
- दररोज केवळ १,००० भाविकांना प्रवेश दिला जाणार.
- दि. १५ जून ते ३० जून या कालावधीत सकाळी ७.०० ते ११.०० या वेळेत दर्शनाची व्यवस्था असेल.
- ऑनलाईन नोंदणी केलेल्या भाविकांनी वैध ओळखपत्र सोबत आणणे बंधनकारक राहील.
अधिक माहितीसाठी आणि नोंदणीसाठी श्री क्षेत्र भीमाशंकर देवस्थान ट्रस्टचे अधिकृत संकेतस्थळ ला भेट द्यावी, असे आवाहन देवस्थान ट्रस्टतर्फे करण्यात आले आहे.
