दुर्गम भागातील विद्यार्थ्याची राज्यस्तरीय भरारी
तिसफोडीपाडा जि.प. शाळेचा विद्यार्थी सहन पावरा राज्यस्तरीय परीक्षेत चमकला
अक्राणी, प्रतिनिधी
अत्यंत दुर्गम आणि मूलभूत सुविधांपासून वंचित असलेल्या अक्राणी तालुक्यातील तिसफोडीपाडा (शेलकुवी) जिल्हा परिषद शाळेने शैक्षणिक क्षेत्रात उल्लेखनीय कामगिरी करत यशाचा नवा अध्याय रचला आहे. शाळेचा विद्यार्थी सहन मेरसिंग पावरा याची पुणे येथील नामांकित स्वरस्वती विद्या ॲकाडमी, लोणावळा येथे इयत्ता सहावी प्रवेशासाठी निवड झाली असून, नंदुरबार जिल्ह्यातून त्याची एकमेव निवड झाल्याने परिसरात आनंदाचे वातावरण निर्माण झाले आहे.
*सहन पावरा हा बिलगाव हेंद्र्यापाडा या दुर्गम वस्तीतील मुलगा . गावाला रस्ता नाही, वीज नाही, शाळा नाही अशा परिस्थितीतूनही त्याने शिक्षणाची जिद्द कायम ठेवली. वयाच्या सातव्या वर्षी इयत्ता दुसरीत प्रवेश घेतलेल्या सहनने अभ्यासातील सातत्य, शिस्त आणि प्रामाणिकपणाच्या जोरावर नेहमीच वर्गात प्रथम क्रमांक पटकावला. त्याच्या गुणवत्तेची दखल घेत शाळेने त्याच्यासाठी निवासी सुविधाही उपलब्ध करून दिली.
आज इयत्ता पाचवीत शिक्षण घेत असतानाच सहनने राज्यस्तरीय प्रवेश परीक्षा उत्तीर्ण करून आपल्या शाळेचे, गावाचे आणि जिल्ह्याचे नाव उज्ज्वल केले आहे.
«“मला खूप शिकायचे आहे आणि देशासाठी काहीतरी मोठे करायचे आहे,”
— सहन पावरा»
शाळेच्या यशाचा गौरवशाली आलेख
- सैनिकी शाळा प्रवेश :
यंदा ८ विद्यार्थ्यांनी सैनिकी शाळेसाठी अर्ज भरले असून १००% विद्यार्थी प्रवेशपात्र ठरले. - क्रीडा क्षेत्रातील यश :
केंद्रस्तरीय क्रीडा स्पर्धेत “क्रीडा भूषण पुरस्कार” प्राप्त. - परसबाग स्पर्धा :
प्रधानमंत्री पोषण शक्ती योजना अंतर्गत आयोजित स्पर्धेत विशेष बक्षीस. मुख्यमंत्री माझी शाळा सुंदर शाळा स्पर्धा :
तालुकास्तरावर द्वितीय क्रमांक प्राप्त. - आदर्श शाळेचा सन्मान :
केंद्रीय स्तरावर सर्वाधिक पटसंख्या असलेली आदर्श शाळा म्हणून गौरव. यशामागील प्रेरणादायी हात
या यशामागे मा. केंद्रप्रमुख रघुनाथ बळसाने, सरपंच पिंटू दादा , शा व्य स अध्यक्ष श्री प्रकाश पावरा, मुख्याध्यापक श्री भगतसिंग पावरा, शिक्षक अशोक ठाकरे, नंदलाल पावरा, युवा शिक्षक पंढरीनाथ धनगर तसेच विलास वसावे यांचे मोलाचे मार्गदर्शन लाभले.
*«“दुर्गम भागातील विद्यार्थ्यांमध्ये प्रचंड क्षमता आहे; योग्य संधी आणि मार्गदर्शन मिळाल्यास ते नक्कीच मोठीभरारी घेऊ शकतात.”
— श्री.भगतसिंग पावरा
मुख्याध्यापक»
तिसफोडीपाडा शाळेची ही प्रेरणादायी यशोगाथा संपूर्ण नंदुरबार जिल्ह्यासाठी अभिमानाची बाब ठरत असून, इतर ग्रामीण व दुर्गम भागातील शाळांसाठी निश्चितच दिशादर्शक ठरणार आहे.
